Il status da protecziun dal luf sin nivel europeic duai vegnir discutà gia vers la fin da quest onn. Fin ils 22 da settember vegnia rimnà sistematicamain datas or da l'entira Europa davart las populaziuns da lufs, ha annunzià la presidenta da la cumissiun da l'UE, Ursula von der Leyen. In post d'annunzia saja pront. Pli bleras datas ch'arrivian e pli exact saja il maletg, saja l'examinaziun dal status da protecziun, ha manegià von der Leyen.
Sin basa da quellas datas vegn la cumissiun a decider, sch'ella duai proponer in sbassament dal status da protecziun. En l'UE èn lufs protegids fermamain, las autoritads localas pon dentant far excepziuns. Perquai che populaziuns creschan e chaschunan problems en pliras regiuns vegn il status da protecziun discutà.