En ina veglia abitaziun a Tel Aviv, 20 meters sper la mar, viva Lissa Manetsch Dorokhin ensemen cun ses um, ses dus uffants pitschens e dus chauns. Il venderdi passà è ella stada ensemen cun ses um ad ina nozza d’amis. Là han els gì in bel temp e n'avevan anc betg l'idea tge che spetga els. Els avevan planisà per la sonda ch’els passentian temp a la riva cun la famiglia. Sonda saja adina di da famiglia, nua ch'els passentian ensemen il temp. Igl è dentant vegnì tut auter che planisà.
Dapi sonda n'avain nus nagin mintgadi pli. Nus na lavurain betg pli, ils uffants èn a chasa e nus essan tut il temp en prontezza d'alarm.
Sonda en damaun a las 6:30 èn els vegnids stgarpads or da la sien. 1 minuta 30 secundas, uschè bler temp hajan els per sa render en segirtad.
In bunker n'avain nus betg. Nus currin or da l'abitaziun e sut la stgala ed ans zuppain là cun las vischinas ed ils vischins.
Pliras giadas al di tuna l'alarm. L'ambulanza ha perfin in'autra sirena per ch'ins na scumbiglia betg quella cun l'autra sirena. Uschia san ins era cura che rachetas vegnan, menziuna la dunna cun ragischs da Mustér. I saja extrem, damai ch'els audian tut las rachetas che vegnian neutralisadas. Ma betg mo quellas, era quellas che detuneschan en la citad audian els.
Tut ils abitants hajan survegnì ina sms da la regenza. Là vegnia mussà tge provisiuns ch'ins duess avair per surviver almain 72 uras en protecziun.
Il natel è pia in impurtant med per survegnir infurmaziuns per ella e da communitgar cun amis ed amias.
Infurmaziuns na survegnia ella betg pli mo da las medias, mabain era entras social media.
En medias socialas ves jau mo pli annunzias da persunas sparidas. Il frar da l’amia, il bab d’in ami ed anc blers auters.
Er en lur conturns sajan vegnids mazzads intgins enconuschents. I saja simplamain trist sco che tuts vegnian mazzads, n'emporta betg sche vegl u giuven, dunna u um, di ella vinavant. Ella na po betg descriver ses sentiments. I saja simplamain brutal. Tema per sia vita n’haja ella betg. Ella ha be tema per ses uffants e less ch’ils uffants sajan en segirtad. Ella na sa anc betg, tge ch’ella fa. Sch’ella turna cun sia famiglia en Svizra u sch’ella resta là. Fin uss n’aveva ella anc nagina pausa e nagina pussaivladad da discutar las opziuns cun ses um. Per ella vai en emprima lingia per la segirezza da ses uffants.
