L’intelligenza artifiziala na saja betg ina intelligenza, mabain mo in process da pavlar ils computers cun infurmaziuns e cun datas, uschia ha la professura da l’EPFL Sabine Süsstrunk declerà. Daco che quest svilup saja il mument dapertut actuala è perquai ch’ils computers pon uss surlavurar milliardas da datas e uschia dar respostas e dumondas quasi sco umans. Ma per exempel na possia ina maschina mai dir ch'ella na sappia betg insatge. Ina resposta vegnia adina.
Per RTR e la SRG.R è surtut il svilup en favur da la lavur schurnalistica d’impurtanza, ma era il svilup da maschinas che pon translatar il rumantsch en autras linguas. Qua fetschia RTR ina lavur fitg impurtanta ha era cusseglier guvernativ Jon Domenic Parolini accentuà en ses pled d’avertura.
Undrà dus umens d’ina vegliadetgna da 190 onns
Ils dus umens ch’han survegnì il premi da l’SRG.R Alexi Decurtins e Gion Tscharner dumbran communabel 190 onns. Alexi Decurtins che vegn quest onn anc 100 onns ha tegnì in pled impressiunant cun appellar era a las medias da mantegnair la lingua rumantscha e surtut da mantegnair la qualitad da quella.
Era Gion Tscharner ha discurri avant las radund 60 persunas preschentas. El ha a moda umoristica, cun ses spezial idiom da Sched, enumerà l’etimologia dals vitgs da Razén fin a Glion. La laudatio per Alexi Decurtins ha Arnold Spescha, ses anteriur scolar, tegnì. La laudatio per Gion Tscharner ha Jon Domenic Parolini tegnì. En ses pled ha el accentuà: La parallela tranter la lavur per ils vocabularis e dicziunaris e la lavur actuala da l’intelligenza artifiziala è evidenta.
