Cura che Google ha inizià il servetsch da chartas ils 8 da favrer 2005 devi gia diversas firmas che purschevan servetschs digitals da cartas e Google ha nizzegià questas cumpetenzas. In onn avant ha il concern numnadamain cumprà differents start-ups sin l'entir mund per rimnar questa savida. La basa per chartas digitalas vegn er or da la Svizra, d'Endoxon, ina firma da Lucerna. Era quella ha Google cumprà.
Stefan Muff, il schef da la firma, ha sco emprim producì chartas da palpiri, enfin ch'el ha vis co ses figl ha dà in gieu online ed ha vis là co ina charta digitala po funcziunar.
Tar mes figl hai jau vis ch'ils gieus han chartas digitalas fitg spertas. Quella idea cun la tecnica vitiers avain nuss lura implementà en nos sistem.
La basa tecnica d'Endoxon ha Google cumbinà cun il project da geomapping da la firma danaisa Where 2 Technologies, per crear ina charta pli favuraivla per las utilisadras ed ils utilisaders. Cumbinà cun la tecnologia da Zipdash, ina firma ch'analisescha il traffic, ha Google pudì porscher in servetsch che mussava quant ditg ch'ins dovra d'in punct a l'auter. Suenter in emprim success en l'America ha Google era purschì il product en l'Europa, il 2006.
Dus onns pli tard ha l'invenziun dal smartphone motivà Google d'adattar Maps per il telefonin. Enfin lura funcziunava quai be sin il computer. En ils onns suenter è l'app vegnida engrondida cun maletgs da lieus (Google Streetview) u era cun infurmaziuns davart ustarias u hotels. Ozendi vegn Google Maps duvrà da passa duas milliardas persunas mintga mais e mintg'onn vegnan 780 milliardas kilometers fatgs cun agid d'ina charta da Google.
Protecziun da datas
L'applicaziun digitala è gratuita per tuts che dovran ella. Co vegn questa purschida dentant finanziada? Google sez fa daners cun reclama che vegn mussada a las utilisadras ed als utilisaders. Ustarias pon per exempel pajar per ch'ellas vegnian mussadas sco emprim sin la glista d'ustarias en ina citad sin Google Maps. Fitg impurtant per Google è dentant era ch'els pon rimnar ina massa datas persunalas. Tenor la configuraziun da standard dastga Google arcunar mintga posiziun nua ch'il telefonin sa chatta e quant ditg ch'el è là. Google po cun quellas datas configurar reclama persunalisada. Sch'il telefonin registrescha per exempel ch'ins è stà airi pli ditg davant ina vitrina per chalzers da muntogna – poi esser ch'ins survegn la proxima giada sin Youtube in clip da reclama per chalzers da muntogna.
Google Maps na porscha betg la transparenza che vegn pretendida da la lescha europeica sco era federala da protecziun da datas.
Tenor il responsabel da protecziun da datas dal chantun Turitg, Bruno Baeriswyl, n'èsi betg cler tge che Google fa tut cun questas datas. Tenor el violescha Google la lescha europeica e federala da protecziun da datas. La lescha pretenda atgnamain che l'utilisader e l'utilisadra san adina tge che vegn fatg cun lur datas. Google da l'autra vart argumentescha, ch'ins possia era tschentar giu il servetsch da rimnar datas, entras quai na cuntrafetschian els betg a la lescha.
Or da l'archiv:
Ina alternativa a Google Maps.