Cookies, sfera privata, etc. - Lescha da protecziun da datas va en vigur

Las configuraziuns da standard ston esser orientadas vi dal minimum da rimar datas sin paginas d'internet, apps etc. Mo sch'ina persuna vul laschar ora dapli datas che quai ch' ella dovra per l'intent d'utilisaziun, po ella midar sez la configuraziun.

Obligaziun d'infurmar: Tenor la lescha davart la protecziun da datas revedida èn las persunas responsablas obligadas d'infurmar persunas pertutgadas.

Dretg da survegnir infurmaziuns: Mintga persuna ha il dretg da vegnir a savair, sch'i vegnan rimnadas datas sur dad ella. Ella po pretender che las datas vegnian rectifitgadas u stizzadas. Tenor l'incumbensà federal per la protecziun da datas e per la transparenza ston las utilisadras ed ils utilisaders pretender sezs lur dretgs.

Disposiziuns penalas: La lescha davart la protecziun da datas revedida prevesa per exempel in'uschenumnada obligaziun da cooperar tar ina retschertga da l'incumbensà federal per la protecziun da datas e per la transparenza, sch'i vegn suspectà ch'i saja vegnì cuntrafatg a la lescha davart la protecziun da datas.

Pertge è la lescha vegnida repassada? L'emprima lescha federala davart la protecziun da datas è entrada en vigur en Svizra l'onn 1993. Per tegnair pass cun il progress tecnologic e cun la digitalisaziun creschenta è il project vegnì revedì parzialmain l'onn 2008 e suttamess ad ina revisiun totala a partir da l'onn 2017. Questa nova lescha vala a partir dal 1. da settember 2023.

Tgi pertutga la lescha? La lescha vala per persunas natiralas, interpresas ed instituziuns. En quest connex extenda la lescha dentant mo sin datas da persunas (persunas natiralas) e betg sin persunas giuridicas (interpresas).

Tge novas pussaivladads han las utilisadras ed ils utilisaders per sa defender cunter cuntravenziuns? En cas da cuntravenziuns èsi pli simpel da sa dustar. Sche persunas pertutgadas n'èn betg cuntentas cun l'infurmaziun da datas, pon ellas sa drizzar a l'incumbensà federal per la protecziun da datas. Quel po iniziar in'inquisiziun. Tras la nova lescha davart la protecziun da datas vegn rinforzada la rolla da l'incumbensà federal per la protecziun da datas e per la transparenza: El vegn ad intensivar sia activitad da surveglianza ed ad augmentar il dumber da las examinaziuns. En cas da violaziuns da la segirezza da datas exista per las interpresas in'obligaziun d'annunzia: a l'incumbensà federal per la protecziun da datas e per la transparenza ed en cas grevs er a las persunas pertutgadas.

Tge sa mida per las utilisadras ed ils utilisaders? Uschè ditg che las utilisadras ed ils utilisaders na daventan betg activs sezs, sa mida insatge cun l'entrada en vigur da la nova lescha mo en quest connex. Igl è pia era vinavant chaussa da la singula u dal singul da vegnir activ.

Nua è la differenza la pli gronda cumpareglià cun l'ordinaziun davart la protecziun da datas da l'UE (OPD)? En l'UE èsi da princip scumandà d'elavurar datas persunalas e dovra adina il consentiment. En Svizra èsi viceversa – l'elavuraziun da datas persunalas è da princip permessa e na dovra nagin consentiment.