Trais giadas cunter la veglia dal Cussegl federal ed il parlament ed ina giada sco giavischà. Uschia pudess ins resumar la dumengia da votaziuns. Tenor l'institut da perscrutaziun gfs.berna han las autoritads federalas adina dapli difficultads da persvader il pievel – e quai gia dapi las elecziuns naziunalas dal 2019. E quest fatg saja s'accentuà anc pli fitg durant la pandemia da Covid-19.
Durant questa legislatura ha la Svizra votà davart 26 fatschentas – 12 iniziativas e 14 referendums. Nov giadas ha il suveran svizzer votà cunter la veglia da Cussegl federal e parlament. Quai munta ad ina quota da success da 70%. I dat dentant en egl che surtut referendums han pli savens success a l'urna. Lezza quota munta a 43% – tenor l'analisa dals politologs è quai remartgabel.
