L'entira charta svizra è stgir-cotschna. Quai munta che almain 65% da tuttas votantas e votants en tut ils chantuns han vuschà Na. La finala sa resulta in Na da passa 79% sur l'entira Svizra – in resultat fitg cler.
Cler Na er en Grischun
En Grischun din prest 78% Na a l'iniziativa. La suletta vischnanca che di Gea, è Santa Maria en Calanca. Dentant è la decisiun er là stada plitost stretga cun 53,7% per l'iniziativa. Il pli cler Na di la vischnanca da Val Son Pieder, cun 89,3%.
Grischun: Iniziativa per scumandar experiments cun animals ed umans
Resultat
En Grischun è la participaziun a la votaziun stada stada tar 40,3%.
Quai leva l'iniziativa
L’iniziativa vuleva scumandar experiments cun animals ed umans en Svizra. Experimentar cun animals che na pon betg dar il consentiment u era cun umans na saja pervi da raschuns eticas betg perstgisabel, argumenteschan ils iniziants. En consequenza fiss era l’import da products ch’èn vegnids sviluppads cun tals experiments vegnì scumandà. La scienza che na fa nagins experiments cun animals avess en avegnir duì survegnir almain tuttina blers daners da la Confederaziun, sco la scienza ch’experimentescha oz cun animals.
RTR tegna sin il current davart decisiuns communalas e las quatter votaziuns federalas:
- Sin www.rtr.ch chattais tut ils resultats, graficas ed analisas
- Decisiuns impurtantas porscha era social media cun #votaziuns
- Las novitads al radio rapportan mintg'ura dal pli actual
- Reacziuns ed analisas pudais tadlar en emissiuns spezialas al radio las 12:00 - 12:30 e las 16:00 - 18:00
- Il Telesguard resumescha las decisiuns a las 17:30 sin SRF Info