La Confederaziun na duai betg sustegnair cun ulteriurs daners las medias localas e regiunalas. Il suveran ha refusà il pachet da mesiras per las medias e cunquai decis cunter l'avis dal Cussegl federal e parlament.
Mesiras per las medias
Svizra: Pachet da mesiras per las medias
-
GEA
1'085'237 Vuschs
-
NA
1'303'243 Vuschs
Il Cussegl federal ed il parlament hajan surchargià la fatschenta, quai è in dals arguments per il naufragi a l'urna.
Grischun di Na
Il pli cler ha la vischnanca Furna ditg Na, quai cun 75% da las vuschs, suandà da Rongellen en la regiun Viamala. Medemamain cler Na han ulteriuras vischnancas en il Partenz ditg, numnadamain Cunters, Luzein, Küblis, Jenaz e Grüsch. Il pli ferm sustegn per il pachet da mesiras per las medias hai dà en las vischnancas da lingua taliana, Buseno (70% Gea), suandà da las vischnancas Calanca e Soazza. Resguardà tuttas vuschs en ina regiun han sulettamain la regiun Bernina e la regiun Surselva sustegnì il pachet da mesiras per las medias.
En il chantun Grischun munta la participaziun a la votaziun a 40,2%.
La finamira dal pachet da mesiras
Parlament e Cussegl federal vulevan sustegnair medias localas e regiunalas. La finamira era tranter auter da promover medias online u da schlargiar il sustegn da reparter gasettas. Uschia vulevan ins purtar fatg al quint che las medias han adina damain entradas ord reclamas ed inserats. In comité ha fatg il referendum cun l'argument ch'i na dovria betg quest sustegn.
