Trun conta 2024 - Festa da chant a Trun

Suenter las producziuns da concurrenza è suandà l'act festiv a Trun. Durant quest act hai dà differentas producziuns. Tranter auter ha la societad da musica Trun sunà. Ils chors han chantà las duas chanzuns generalas – ils chors virils «Cantadurs en cumpagnia» ed ils chors maschadads «Beinvegni», duas cumposiziuns dad Eduard Lombriser.

Ils videos da las producziuns

Qua datti d'udir in u l'auter resun or dal ravugl dals chors.

Flavio Murer, Gian Caveng e Lorenz Studer vegnan a pled suenter lur producziuns:

Era sche l'aura ha fatg in pau da sturna a Trun, era la baselgia emplenida fin l’ultim plaz per tut las producziuns. Il Chor cecilian Glion ha lantschà la part da concurrenza. L'act festiv per l'avertura da la festa ha dentant stuì vegnir stritgà pervi da la plievgia. Ils da Trun na sa han dentant betg laschà disturbar da quell'aura. Suenter la pausa da mezdi ha il chant liber cumenzà. En la sala dal center communal èn sa preschentads intgins chors anc ina giada cun in pitschen concert.

Vus pudais tadlar e guardar tut las producziuns da la Baselgia s. Martin sin il Playfestas e sin Play RTR.

Qua datti impressiuns da l'inscunter musical regiunal:

Muments da «Trun conta 2024»

Ina dirigenta e chantadura fitg engaschada quinta dal ir a festa cun pliras furmaziuns en differentas funcziuns.

L'occurrenza da chant è vegnida organisada dal Chor cecilian Trun. Trun ha ina fitg lunga e ferma tradiziun chantica. Sper il chor cecilian ch'exista anc oz, aveva Trun en il passà differents auters chors. Il Chor cecilian è vegni fundà vers la fin dal 19avel tschientaner – quai cun il pensum da cultivar il chant liturgic per pudair embellir las festas da baslegia. Oz tgiran els dasper il chant liturgic er il chant profan.

Ina festa da chant duess promover il chant e la cultura e pussibilitar barats ed inscunters tranter il public ed ils participants e las participantas. Mintga singul chor ha gì a disposiziun 15 minutas per la producziun da concurrenza. La schelta è stada libra ed i ha pudì vegnir chantà cun u senza accumpagnament.

30 chors, var 950 chantaduras e chantadurs chantan totalmain 95 chanzuns da concurrenza. Cumponists, cumponistas ed era duas poetessas fitg giuvnas d'intginas da questas chanzuns èn stadas da la partida a «Trun conta 2024». RTR ha discurrì cun il cumponist Flavio Bundi e cun las duas giuvnas poetessas Felissia Candinas ed Amélie Rothmund.

Chors sursilvans sut batgettas da dunnas

Dapi ch'i dat la festa da chant districtuala hai anc mai gì uschè bleras dunnas en la rolla da dirigenta – in terz dals var 30 chors sursilvans èn sut la batgetta d'ina dunna. Fina Blumental, la dirigenta dal chor baselgia catolic da Sagogn, sa regorda che quai era anc tut auter cura ch'ella aveva fatg il curs da dirigenta l'onn 1986. Da lez temp haja dà forsa mo tschintg dirigentas, il rest sajan tuts stads umens. Ella crai ch'ina gronda qualitad da las dirigentas è l'engaschament. Heidi Casutt Cathomen, dirigenta dal chor viril Falera, agiunscha ch'ils umens pon forsa era vertir dapli d'ina dunna.

Ils umens dals chors han en mintga cas da raquintar bler positiv da la lavur e las qualitads da lur dirigentas. Intgins èn gia uschè ditg sut la batgetta d'ina dunna ch'els n'enconuschan era nagut auter:

Tuns e suns da Trun conta 2024

L'organisaziun da la part musicala

L'um dal sudoku, Daniel Pally quinta da tut quai che ha da funcziunar per che uschè in di plain program possia funcziunar senza incaps. Era il president dal district René Buchli s'exprima davart sia impressiun da la festa.

Quant bain enconuschais vus las chanzuns da chor?

Per propi er integrar la festa en il vitg, han ils chors gì la pussibilitad da sa preschentar entaifer las producziuns libras en il «vitget da cant».

A la fin da mintga festa da chant stattan ils predicats – e sa chapescha pli tard era il far festa. Ils predicats che vegnan surdads tanschan da cuntentaivel, bun, fitg bun fin excellent. A la festa «Trun conta 2024» hai dà quellas bunas u forsa in zic main bunas novas:

Trun conta 2024 – il program en detagl:

Gust da tadlar musica?

Avrir la box Serrar la box

Sin nossa plattafurma Play Festas chattais era numerusas registraziuns da Festas da chant dal passà. Nus giavischain bun divertiment.