Grazia a l’amur è Nina Mayer arrivada avant passa 20 onns en l'Engiadina Bassa, nua che la dunna da 42 onns abita cun ses um e lur duas figlias a Ramosch. Oriunda è la chantadura, cumponista e dirigenta da plirs chors da la Germania. Aifer be in onn haja ella emprendì rumantsch - quai era grazia a sias duas figlias.
Per l’integraziun en ina regiun èsi impurtantischem da savair la lingua. Pir lura emprend'ins ad enconuscher la cultura e la glieud.
La passiun per il chant e la musica saja gia adina stada fitg gronda, malgrà che Nina Mayer deriva d'ina chasa da medis. Il diriger plirs chors dad uffants e creschids, sco er l’instruir plirs instruments e chant per la scola da musica, è il mintgadi da la pedagoga, e la dettia er adina puspè satisfacziun. Surtut la lavur cun uffants, da mussar a chantar, saja la conferma ch’ella saja sa decidida per la gista direcziun en sia vita professiunala.
Musicists e musicistas en il Profil
Sper il plaschair e la passiun per sia famiglia e la musica enconuschia Nina Mayer dentant era muments main suleglivs en sia vita cun fasas da depressiun.
Jau sai, co che quai è dad esser sur in lung temp en l’umbriva.
Impurtant saja da discurrer avertamain davart il tema e betg tabuisar el. Ultra da quai ha Nina Mayer emprendì da tadlar fitg bain sin ses corp e ses basegns.
