(sursilvan) Enconuscheis Vus, caras lecturas e cars lecturs, la muntada da Vies prenum? Cu geniturs enqueran in num per lur affon nunnaschiu, vegnan els probabel strusch ad eleger quel primarmein tenor la muntada. Auter eis ei en la Bibla. Leu stattan ils nums da persunas pil pli en connex cun igl esser, cul dafar ni cun la cumparsa dalla persuna.
Aschia era il num hebraic «Rut». El munta «amitga» e Rut semuossa daveras amicabla. Quella giuvna dunna ei ina da mias figuras preferidas en la Bibla. Ad ella ei in entir cudisch biblic dedicaus. Cun ses quater capetels eis el cuorts, mo el vala sco pedra litterara.
Rut ei ina dunna moabita. Ella ei promta da bandunar sia patria per accumpignar la sira Naomi (hebr. l’amabla) anavos a Betlehem. Da leu eran Naomi e sia famiglia fugi avon onns, muort in fomaz. Igl um da Naomi e ses dus fegls eran morts a Moab, ella tiara nua ch’els vevan survegniu asil.
Possien tuts, schibein quels che astgan ed oravontut quels che ston viagiar, sesentir accumpignai dalla benedicziun da Diu, mo era dad amicabels carstgauns, aschia sco Rut.
Per Rut eis ei buca vegniu en damonda, da schar partir Naomi, sco ei era previu, tut persula. Ils plaids che Rut ha drizzau viers Naomi en quei mument da partenza lain sentir che Rut agescha buca mo sco brit, mobein oravontut sco amitga: Nua che ti vas, mon era jeu, e nua che ti sefermas, sefermel era jeu. Tiu pievel ei miu pievel, e tiu Diu ei miu Diu. Nua che ti mieras, vi era jeu murir e vegnir satrada (Rut 1,16b-17a).
Sin l’emprema egliada para quella bellezia empermischun da Rut da prender dad ella tutta identitad. Ella semetta dil tuttafatg el survetsch da sia sira. La cuntinuaziun dalla historia muossa denton che la promtadad da Rut, da parter cun Naomi buca mo la via mobein era la finamira e visiun pil futur, porta ventira ad omisduas.
Il raquent da Rut ei mo in dils numerus exempels en la Bibla nua che carstgauns ein sin viadi. Quei fagevan els denton buc ord spir plascher, per scuvierer novas cuntradas e prender distanza dil mintgadi. Lur esser sin viadi muntava nuot auter che l’emprova da surviver.
Igl esser sin viadi ei era in grond tema en nos dis. Ferton che biars astgan guder las varts positivas dil viagiar e passentar vacanzas, ein auters confruntai cun las varts tragicas dil stuer esser sin viadi: fugia en consequenza d’uiara, catastrofas dalla natira, violenza ed aunc bia auter. Astgar e stuer – dus aspects dil viagiar che stattan en ferma cuntradicziun. Ina sfida en nies temps!
Possien tuts, schibein quels che astgan ed oravontut quels che ston viagiar, sesentir accumpignai dalla benedicziun da Diu, mo era dad amicabels carstgauns, aschia sco Rut. Forsa che siu num savess esser program per in bien s’inscuntrar:
R – respect
U – udida
T – toleranza
