(vallader) «Che catastrofa, tuot es i in malura!» Meis bap cloma sü dal schler tuot agità. Davant la glatschera ha’l chattà ün lai cotschen brünaint, la porta da la s-chaffa fraida mezz’averta: «La porta nun es statta serrada inandret e tuot il cuntgnü es sdrelà!» E la catastrofa d’eira tant plü gronda cul fat cha nus vaivan cumprà be ün pêr dis avant ün quart vadè.
Id es stat üna bun’occasiun ed i füss stat puchà da nu profitar, eir schi d’eira vairamaing bler massa blera charn per nus. A la fin esa stat tanta charn cha nossa glatschera d’eira implida fin süsom e cha dafatta ün vaschin ha amo güdà oura ed ha tut pro el ün pêr tocs. Ma da tuot quai nun es restà bler. Cun verer plü precis la situaziun, vaina stuvü constatar cha tuot la mangiativa d’eira ida in malura. La glatschera es statta averta almain trais dis.
Sengs da recugnuschentscha per la generusità da nossa natüra e da Dieu.
Suot il strich esa però i amo bain, ingün da nus nun ha gnü da patir fom. In üna sumaglia biblica vaja oura bler plü mal. Là quinta Gesu dad ün hom chi ha gnü üna racolta ourdvart buna e vaiva massa pac lö per tuot sia granezza. Perquai ha’l ponderà da fabrichar ün graner plü grond e da viver da quinderinvia da sias reservas. In quel mumaint til appara Dieu e disch: Tü nar, amo quista not vain ti’orma dumandada da tai; a chi appartgnarà lura tuot quai cha tü hast raspà insembel? Uschea va quai cun quel chi raspa tesors per sai stess e nun es rich in Dieu. (Lc1216-21)
Stimada lectura, stimà lectur, quista dumengia vain festagiada in nossas cuntradas la festa da la racolta. Cun festas grondas e bellas sco in Val Müstair o cun uters e maisas dal Segner decoradas cun premura cun nossa racolta – segns da recugnuschentscha per la generusità da nossa natüra e da Dieu. I vain ingrazchà per tuot quai chi’d es creschü suot noss mans. Ed i vain parti – pan, vin e cumpagnia in algrezcha – perquai chi s’accumplischa di per di nos aröv: «Il pan da minchadi dà a nus hoz.»
Quant dalöntsch davent sun in quel mumaint ils pissers pervi da la glatschera daplü co plaina! Schi va per festagiar la vita nun esa per furtüna ingün lö per roba dscheta.