Pled sin via - In telefon cul papa Francestg

(sursilvan) Mintga sera entuorn las siat stgalina il telefon ella pervenda dalla «Sontga famiglia» el marcau da Gaza. Da l’autra vart dalla lingia ei negin auter ch’il papa. El fa quitaus per la veta da 450 persunas, fugitivas e fugitivs palestines che han anflau dapi Nadal albiert ella pervenda dalla «Sontga famiglia». Mintgaton cuozi quei clom mo in mesa minuta, enqualga era dapli, perquei che la lingia vegn adina puspei interrutta, raquenta cardinal Pierbattista Pizzaballa, il patriarch latin da Jerusalem e representant dil papa en Tiara Sontga.

Quei telefon da papa Francestg ei daventaus pils affons che vivan leu cun lur geniturs en gronda miseria in clom dad in «tat» che fa quitaus per ses biadis.

Ei quei buc in bi segn da confiert e sustegn psicologic, emoziunal e spirtal, pia ina consolaziun per quels fugitivs che vivan en ina regiun d’ina uiara brutala, la quala cuoza gia bia memia ditg.

Gest en temps da grondas difficultads sa la cardientscha esser in agid per tener ora igl insupportabel.

Naturalmein ch’in gest da consolaziun tonscha buc, oravontut sch’ins pren en consideraziun che las persunas sin fuigia han buc avunda aua, vivonda, medicaments, ed ils affons san dapi dus onns buc ir regularmein a scola. Entginas organisaziuns internaziunalas porschan entras las baselgias localas agid als fugitivs cun medicaments, maglia, dormitoris, scaldaments e tut quei ch’ei necessari per surviver mintgadi en in contuorn d’uiara nua che bumbas e missils explodeschan di per di.

Podcast Vita e cretta

L’ura da religiun è ina oasa da tempra religius-meditativa cun novitads or dal mund da las religiuns, predi/meditaziun e dapli.

Ulteriurs audios e podcasts

La religiun sa esser per nus ina reha fontauna da grazia che porscha sustegn e confiert ella veta quotidiana. Per surviver drova ei en emprema lingia vivondas ed in tetg segir sur il tgau – la cardientscha sa denton regalar speronza. Quella experientscha hai jeu astgau far biaras gadas el decuors da mia veta.

Cun ses telefonats less il papa regalar speronza e mussar ch’els vegnien buc emblidai dil rest dil mund. Ed era nus pudein gidar: cun sustener las organisaziuns che gidan en las tiaras che piteschan dall’uiara e cun nossas oraziuns per la pasch.

Il papa ha annunziau igl onn sogn sco onn da la speronza – jeu sperel ch’il papa stoppi beingleiti buca pli far ils telefonats en Gaza, mobein che la pasch regi era leu.