Ils ultims mais èn stads difficils per Liliia Havrylova. La dunna da 43 onns viva cun sia figlia, ses geniturs e ses frar en ina abitaziun a Cuira. Ses um è lunsch davent – el è schuldà en la guerra. La dunna d'in schuldà stoppia adina far quint da mai pli vesair ses um.
Mes um è vegnì tutgà dad ina bumba. El ha plain tocs da metal en ses corp. Igl è ina miracla ch'el ha survivì. Quai è capità avant set mais – oz vai meglier cun el.
La figlia Adelina fa il 10avel onn da scola. Ella ha chattà in nov hobi: dar spada – in sport ch'ella exercitescha duas giadas l'emna. En la halla da sport sa senta ella bain. «Qua hai jau chattà bleras novas amias ed amis. I è sco in segund dachasa», raquinta la giuvna da 16 onns. L'avust cumenza ella l'emprendissadi sco laboranta.
A Mustér ha Artem Ponomarenko gia cumenzà l'emprendissadi sco spezialist da sanadad en il center da sanadad Puntreis. L'entschatta a Mustér saja stada fitg greva per el. «Jau na pudeva betg acceptar d'avair stuì bandunar la patria. Jau na pudeva betg m'imaginar mes futur en Svizra», sa regorda Artem. Cun il temp ha el emprendì tudestg en la scola dal vitg ed è s'integrà. Il video qua sut mussa ses mintgadi en la chasa d'attempads.
Varvara ha emprendì rumantsch
Varvara Leschenko ha cumenzà avant dus onns e mez l'emprima classa a Müstair – senza savair in pled rumantsch. «Jau hai tadlà co ils auters uffants baterlavan ed uschia jau emprendì rumantsch», raquinta la mattetta. Uss en la terza classa emprenda ella schizunt tudestg. Ella frequenta uras da tudestg supplementaras e less in bel di daventar magistra.
Jau less emprender tudestg, perquai che betg tut las persunas qua discurran rumantsch. I fiss bel sche jau pudess discurrer cun tut las persunas.
