(vallader) L’on 2025 es be güst ün mais vegl ed i para minchatant cha tuot il muond as vess müdà in quista cuorta pezza. In quists dis as poja tschüffer l’impreschiun cha ingüns uordens ed ingünas cunvegnas nu valessan plü. Cha tscherts potentats politics ed economics han tut per mans per demontar il muond sco cha nus til cugnuschain e da s-chaffir ün uorden nouv tenor lur gust. Ils Stadis Units, la China, la Russia e divers oters. Schi, davo il prüm mais as poja dir cha’l 2025 ha cumanzà cun ün veritabel terratrembel, ed il privel es grond da perder il fuond suot ils peis, scha inchün lascha gnir massa dastrusch la lavina da las novitats ed agitaziuns mundialas. Ed eu dun pro, ch’eir eu am zoppess minchatant il plü jent suot la plüma, cur ch’eu leg tschertas lingias grassas illas medias.
In quist lö dvainta la devisa annuala da quist on ün muossavia. Ella disch: «Examinai tuot ed il bön retgnai» (1. Tess 5,21). Quist citat da la charta a la raspada da Tessalonichu cumpiglia duos pass:
Il prüm pass es dad examinar tuot per verer nan precis. E quia es manià propa tuot: quai ch’eu n’ha adüna tut sco vardà e chi m’es dvantà üna chara pozza e da tschella vart eir tuot quai ch’eu n’ha fin uossa valütà sco il plü grond tagnin e ch’eu n’ha adüna sbüttà. La masüra pro l’examinaziun dess adüna esser schi serva a la vita o na. «Examinai tuot» ans preserva da güdichar massa svelt in ün muond chi’s müda cun ün tempo chi’ns ris-cha da tour il flà. Mincha examinaziun douvra nempe temp e quist temp ans dà la distanza e nouva calma per güdichar bain.
Il seguond pass es da gnir activ, da retegner il bön per til metter in valur. Da focussar sül bön per til cultivar per ch’el possa crescher e portar früt. Quai manaja da star aint per tuot chi serva a la vita, eir schi nu correspuonda a la tenuta da la majoranza.
L’on 2025 es ün mais vegl e la devisa «Examinai tuot ed il bön retgnai» am para ün bun muossavia per restar critic, activ e constructiv in ün muond agità e minchatant confus. Paulus maina quist impissamaint sül punct cur ch’el scriva als Romans, «Nun as laschai survendscher dal mal, dimpersè survendschai il mal tras il bön».
