(vallader) Quist’eivna es gnüda publichada la biografia dal papa da Roma. Papa Francesco descriva in seis cudesch sia vita, seis caracter e co ch’el funcziuna. Ed el discuorra eir sur da seis problems, sias difficultats, sias deblezzas e sias neurosas. Quai chi til fa natüralmaing eir simpatic. Sco seis plü grond problem persunal vezza el sia mancanza da pazienza. Il papa disch ch’el haja bler massa paca pazienza e cha pervi da quai capitan adüna darcheu sbagls e robas negativas in sia vita.
Eu pens cha na be il papa, ma eir blers, forsa bod tuots da nus cugnuoschan quista tematica. Scha nus nu vain pazienza, sforzaina e lura es il resultat suvent pac positiv. Quai chi dà in ögl a mai es cha nossa pazienza nu manca suvent na be invers situaziuns ed oters umans, dimpersè ella ans manca eir ed impustüt cun nus svess. Suvent vain nus propa nolla pazienza cun nus svess. Minchatant eschan nus fich dürs e brutals invers nus. Nus fain giò a nus svess. Cun oters es quai forsa tuot oter, lura vain nus bainschi blera pazienza, incletta, acceptanza e toleranza, ma cun nus svess brichafat.
In nus daja ün güdisch sever chi ans cundanna in ün möd fich crudel e destructiv. Ün’instanza chi disch: «Perche nu sast quai amo adüna na? Tü nun es simplamaing na capabel. Nun est amo adüna na plü madür? Nun imprendast tü vairamaing nöglia in tia vita?» Ün güdisch sever e crudel, ün güdisch brutal chi vezza be il negativ in nus. Ün güdisch chi po propa esser ün tiran, chi fa gnir fich greiv nossa vita e tilla po dafatta ruinar e desdrüer.
La mancanza da pazienza invers nus svess ha dachefar cun quist güdisch intern. Puchadamaing crajain nus bler massa suvent a quist güdisch – eir sch’el disch vairamaing bod adüna be manzögnas. Scha nus savessan propa che e chi cha nus eschan, scha nus fessan be ün cuort mumaintin l’experienza da nos s-chet esser, lura svaniss quist güdisch intern per adüna our da nossa vita. E quista experienza giavüsch eu a papa Francesco ed a nus tuots.