«Skyline», «Man on Mars», «I Take It All», «Last Night On Earth», i dat bain inqual hit da Pegasus ch’ins auda adina puspè. Quai che ha cumenzà il 2003 cun concerts per la vischinanza cun covers dals Beatles ed autras grondezzas dal rock’n’roll è daventà aifer dus decennis ina da las bands svizras cun il pli grond success. I ha dà plattas d’aur (7) e platin (4), plirs Swiss Music Awards (3) ed in Prix Walo sco newcomer da l’onn 2008. L’onn 2013 è Pegasus ì sin turnea cun la gruppa englaisa Hurts e fatg turnea en Germania, Austria, Belgia, Ollanda e Luxemburg. Be dus onns pli tard han els fatg ina turnea en l’Asia. Quest onn publitgescha la band cun «Twisted Hearts Club» lur 8avel album da studio.
Il dumber da plattas vendidas per retschaiver ina platta d'aur respectiv da platin variescha tranter ils pajais. En Svizra giascha il cunfin tar:
- Singles: 15’000 resp. 30’000 exemplars vendids
- Albums 10’000 resp. 20’000 exemplars vendids
L’onn 2024 è stà previs d’esser in onn lavurus per il quartet da Bienna. Per ina la registraziun da lur album nov «Twisted Hearts Club». Per l’autra ina turnea en il program dal circus Knie nua ch’els han mintgamai dà in concert. Quellas experientschas vuleva la band documentar cun in film da SRF. Curt avant che l’album è stà a fin ed amez la turnea ha dentant il bassist da la gruppa Gabriel Spahni infurmà ch’el bandunia la band sin la fin 2025. In mument suenter ha era il ghitarrist Simon Spahr prendì questa decisiun. Quai n’ha betg be dà in auter focus a la documentaziun da SRF mabain era tut in’autra paisa a l’album «Twisted Hearts Club» e lur turnea 2025 – uss tuttenina l’ultim album e l’ultima turnea en questa furmaziun.
Sin turnea avain nus stuì chattar ina via communabla ed ina frequenza che funcziunescha.
Durant la turnea cun il circus Knie il 2024 haja la gruppa puspè stuì sa chattar danovamain ed empruvar da sa chapir e sentir empatia in per l’auter. Uss stoppian tuts chattar ina nova via – per Gabriel e Simon co far enavant senza Pegasus e per Noah e Stefan co manar enavant il project ubain co fundar ina nova gruppa.
Sche jau vom duas emnas en vacanzas, lura suenter ina mes’emna fai sguzias da sunar ghitarra. Perquai pens jau che musica è definitivamain insatge ch’accumpogna mai.
L’intervista cumpletta cun Noah Veraguth e Gabriel Spani pudais tadlar qua entir ed entratg:
Co tuna quai ultim album?
L’emprima single da l’album pudess retrospectivamain esser stada in indizi per ils fans da Pegasus «How Much Can A Heart Break» (con fitg po in cor rumper). Igl è in imni da pop en il stil da «I Take It All» dal 2014 plain mal il cor. «Twisted Hearts Club» cuntegna chanzuns co ins enconuscha da Pegasus. Chanzuns per maneschas dal circus, per stadions e tribunas grondas – per exempel «Renegade» ubain «My Love» ensemen cun la chantadura Stefanie Heinzmann. Cun «As Long As You Stay Here» u «Better Now» datti dentant era chanzuns per concerts intims. E lura datti era quellas chanzuns che regordan vid lur entschattas sin las vias a Bienna. Chanzuns sco «I’ll Never Tire Of Loving You» che regordan vid ils Beatles e lur vegls idols dal rock’n’roll.
Planisà u betg – cun quest album sa serra il rudè da la gruppa d’amis che ha per amur da la musica ina giada en in tschaler fundà ina band.
Hit per rumantsch
In u l’auter act svizzer ha gia realisà e registrà in da lur hits per rumantsch. Ina selecziun chattais qua ubain sin Play RTR:
