Dapi il prim da november è publitgada la versiun rumantscha da «Dunne mit de Gäng» cun il num «Cheu culla gäng». Sin Spotify ha la versiun rumantscha cuntanschì aifer sis emnas passa 52'000 streams. Per ina chanzun rumantscha è quai ina buna bilantscha. La nova chanzun da Naomi Larène p. ex. ha cuntanschì en il medem temp 77'000 streams, è però era per englais. E la nova chanzun da la rappera grischuna GiGi ha en il medem temp cuntantschì 11'000 streams, lezza è per tudestg svizzer. Er ils frars Hassler èn cuntents cun quest resultat. Resuns han els cunzunt survegnì ord lur famiglia:
Mes buobs vulan l'entir temp be tadlar «Cheu culla Gäng» ed els san gia uss meglier il text che jau.
Malgrà il success da la chanzun na pensan ils musicists da la Svizra centrala il mument anc betg vi d'ina segunda chanzun rumantscha. Tenor els dovra quai l'emprim plitost anc in pèr lecziuns rumantsch. La quarta lingua naziunala giascha dentant fitg a cor ad els.
Magari naschan durant la stad da festival las ideas sturnas. Ina da quellas ha il moderatur da RTR Elias Tsoutsaios preschantà spontanamain a la Stubete Gäng. Quella era vegnida l’emprima saira dal Openair Lumnezia per preschentar ses «Örbn Ländler». Ina meglra occasiun per chantar ina versiun rumantscha da ses hit «Dunne mit de Gäng» na datti bunamain betg. Ditg e fatg, durant l’intervista ha il moderatur confruntà ils frars Moritz ed Aurel Hassler cun l’idea, ch’eran subit da la partida per «Cheu culla Gäng». L'idea concreta: chantar l’emprim vers ed il chorus per rumantsch, live a l'Open Air Lumnezia.
Onurar las ragischs u in'acziun da promo?
Radund in mais suenter l'Open Air sclingia il telefon dad Elias Tsoutsaios. La Stubete Gäng vuless far in’entira versiun rumantscha da «Cheu culla Gäng» e registrar quella en il studio. Ed uschia è naschida or da l’idea sturna da la stad da festival in’entira chanzun rumantscha. Els sajan gea era sin palpiri Grischuns argumenteschan Moritz ed Aurel Hassler. Lur bab Hans Hassler, che fa era part da la Stubete Gäng, è da Cuira. Che l’acziun ha in effect da promoziun è dentant era cler, sche betg il motiv principal per «Cheu culla Gäng».
Il rumantsch va si’atgna via. Sco nossa musica, il Örbn Ländler.
Per la nova versiun èn ils frars Hassler stads il cumenzament d’october en ils HitMill Studios tar lur producent Georg Schlunegger. Cun l’agid d’Elias Tsoutsaios han els registrà il chant rumantsch per «Cheu culla Gäng». Sche quel è gartegià u betg udis qua:
