L’emprima novaziun è ch’el ha questa giada desistì d’ina band e sunà, cun sustegn dal producent Thomas Fessler, tut ils instruments. Uschia saja ses chant, la ghitarra ed il clavazin en il center, ed el possia enramar quai cun tuns da synthesizers vegls ed apparats ch’el haja anc dal temp da sia giuventetgna.
Viador da la via tschorva
Per in detg temp saja Adrian Stern stà en dispita cun sasez. Tar problems omnipreschents sco la midada dal clima, la creschientscha senza fin e las varts negativas dal consum e social media, n’haja el betg pli chattà ina via da far chanzuns che plaschian a ses fans. Sia soluziun era da far chanzuns da buna luna, upbeat dentant cun tematisar ils problems d’ozendi.
Jau n’hai durant quest temp betg savì giudair il bel en mia vita. Tut enturn mai è stà dependenza da consum ubain glatschers che van enavos e tut ha fatg pensiers.
Uschia chanta el per exempel en «Handy» quant grev ch’igl è da metter davent il telefonin malgrà tutta critica envers la tecnica. Ed en «Bubble Tea» propona el cun ina tschegnada da bandunar la raspunera dal mintgadi e sa laschar dar en la «bubble» – quella stanza virtuala da social media e paginas d’internet.
Dilemma dal pop
La finamira d’Adrian Stern è stada da crear musica leva sco cuntrapunct tar las tematicas grevas che fatschentan el en ses texts. «Bubble» cuntegn per quai insaquantas balladas sco per exempel «Vor luuter Bäum» – dentant era cun «Sie isch es Wunder» ni «Bubble Tea» chanzuns per sautar. Tar tuttas ha il chantadur ristgà da stgarpitschar en il kitsch ubain en la banalitad. In act per tegnair l'equiliber che n’è betg adina gartegià ad el. L’otgavel album d’Adrian Stern è in album per ils fans dal chantadur. Ed in album nunpretensius cun musica da pop sco accumpagnament per il mintgadi, e per pudair emblidar quel per in curt mument. Cun tadlar ina segunda giada e sa concentrar pli fitg sin ils texts hai dentant era anc in ulteriur aspect, pli serius e pensiv.
Adrian Stern daventa Andriu Staila
Durant la visita d’Adrian Stern en il studio da RTR avain nus era registrà danovamain sia single «Bubble Tea» – dentant sco gia cun differents giasts en ina versiun rumantscha.
Qua pudais guardar tgi che ha fin ussa, sper Adrian Stern, Stefanie Heinzmann e Lo & Leduc, fatg part da nossa challenge «Hit per rumantsch».
