Line-up OAL 2023 – La pli gronda festa dal Grischun
Or da Giuventetgna dals 08.12.2022.
laschar ir. Durada: 45 Secundas.
Malgrà ch'i n'è anc ditg betg temp per festivals ha il comité d'organisaziun da l'Open Air Lumnezia dà enconuschent ulteriuras bands che vegnan il fanadur sin tribuna a Degen. Quai èn: Franz Ferdinand, Sam Himself, Ta'Shan, Itchy, Nesta and the Blondes, Kids in Cages, Ladunna, Unlsh e 2K Mafia. Gia pli ditg enconuschent eran bands sco Die Fantastischen Vier, Robin Schulz ni Royal Blood.
Regiunal, svizzer ed internaziunal
Era quest onn derivan bleras musicistas e musicists da la Svizra. Ina gruppa indigena è Breitbild, sco gruppa finala la gievgia saira. A bain inqual è anc lur concert da giubileum en la halla da la citad da Cuira en memoria. Dentant datti era plaz per bain inqual talent giuven dal Grischun. Per exempel la gruppa da rock da Flem Nesta and the Blondes ubain il duo rumantsch Ladunna.
Medemamain la gievgia saira po il public sa legrar sin la chantadura vallesana Stefanie Heinzmann ubain Sam Himself da Basilea. Suenter gronds success naziunals sco er en l’Europa ha il chantadur cun la vusch unica il 2023 sia premiera a l’OAL.
Per la generaziun giuvna tranter ils entusiasts ed las entusiastas dal rap svizzer èn Monet192 e Nativ envidads da dar concert a Degen. Ma era rock e pop svizzer èn represchentads. Quai cun la chantautura dal Son Gagl Joya Marleen, il chantautur turitgais Andryy e la gruppa da rock Annie Taylor.
audio
Line-Up 2023
04:51 min, ord Actualitad dals 08.12.2022.
Maletg: RTR
laschar ir. Durada: 4 minutas 51 Secundas.
Ils headliners 2023
Quels ch’emplainan l’areal dal festival avant tribuna fin l’ultim plaz èn dentant las grondas bands, ils acts internaziunals cun il pli grond renum. Tar la 37avla ediziun èn quai trais acts tudestgs cun Die Fantastischen Vier, Robin Schulz, Beatsteaks ed in duo englais Royal Blood. Pia gruppas etablidas, gruppas che han dapi blers onns per part schizunt decennis grond success e ch’èn er en nossas regiuns enconuschentas – forsa cun excepziun dal duo englais.
Insaquants acts a l'Open Air Lumnezia
1 / 13
Legenda:
In dals acts principals è la gruppa tudestga «Die Fantastischen Vier» che fan gia dapi passa 30 onns ensemen musica.
Keystone
2 / 13
Legenda:
Avant 10 onns ha il DJ Robin Schulz gì ses emprim grond success. Fitg enconuschent èn tranter auter ses hits «Sun Goes Down», «Prayer in C» ubain «Sugar».
Keystone
3 / 13
Legenda:
Per lur giubileum da 20 onns han Breitbild emplenì la halla da la citad da Cuira cun bun 6'000 fans. A Degen turnan els gia la gievgia saira.
Keystone
4 / 13
Legenda:
La band da la Scozia è vegnida fundada il 2001 a Glasgow. Franz Ferdinand fan per part Britpop dentant era Rock, Punk e musica da New Wave. Els vegnan per l’emprima giada a sa preschentar enta Degen.
Keystone
5 / 13
Legenda:
Dapi 1995 fa la gruppa tudestga da rock e punk Beatsteaks ensemen musica. Sper die Toten Hosen e die Ärzte tutgan els tar las gruppas da punk tudestgas cun il pli grond success.
Keystone
6 / 13
Legenda:
Per la chantadura vallesana Stefanie Heinzmann ha tut cumenzà avant 15 onns durant in'emissiun da casting en Germania. Oz è ella ina da las pli enconuschentas musicistas svizras.
Keystone
7 / 13
Legenda:
Ina furmaziun da rock nunconvenziunala è il duo Royal Blood. Ils musicists englais fan en dus be cun in bass ed ina battaria musica sc'ina band da rock cumpletta.
Keystone
8 / 13
Legenda:
Il chantadur Sam Himself da Basilea ha gia gì gronds success en Svizra ed era sur ils cunfins ora. Sia vusch unica è quai che resta immediat en memoria.
Keystone
9 / 13
Legenda:
Il november 2022 è Andryy vegnì selecziunà sco SRF3 Best Talent. Il chantautur da Winterthur ha cumenzà il 2016 sia carriera musicala cun il pseudonim Allen Finch.
Keystone
10 / 13
Legenda:
Èn era gia stads SRF3 Best Talent: Annie Taylor. Sper la chantadura Gini Jungi èn anc trais musicists part da la band turitgaisa.
Keystone
11 / 13
Legenda:
La chantautura Joya Marleen ha dad in di sin l'auter gì in grond success en l'entira Svizra ed ha gia gudagnà il 2022 trais SMAs – ina premiera tar il premi da musica svizra.
Keystone
12 / 13
Legenda:
Il rapper Nativ ha cumenzà sia carriera cun la band S.O.S. e cuntinuà il 2015 sco project da solo. Dapi lura ha el gia savì plazzar pliras singles en la parada da hits svizra.
Keystone
13 / 13
Legenda:
In ulteriur musicist dal Son Gagl Monet192. 2018 ha il rapper publitgà ses emprim album. Cun sia collavuraziun cun il rapper tudestg Dardan ha el gia cuntanschì il segund plaz da la parada da hits tudestga.
Keystone
In recept cumprovà
Otg gruppas da rock, tschintg acts da pop, sis giadas hip hop (per giuven e vegl) ed in DJ. Era quest onn emprova l’Open Air Lumnezia dad avair ina buna maschaida tranter geners e generaziuns. Senza pli grondas surpraisas ubain experiments e set gruppa cun dunnas. In recept ch’è sa cumprovà ils ultims onns e che ha pliras giadas procurà per festivals vendids ora.
