Open Air Lumnezia 2022 - Trais dis da festa ed ina finiziun turbulenta

Cura che la forza electrica è crudada ora la sonda saira en parts da la Val Lumnezia, è er il festival stà pertutgà temporarmain. Uss saja anc ina giada dad ir sur ils cudeschs e meglierar tscherts puncts dal concept. Tuttina èsi per Norbert Cavegn stà in highlight da finalmain suenter dus onns puspè pudair manar tras il festival.

Da sulegl enfin variabel

Tut ha cumenzà bain la gievgia a Degen, cun bleras visitadras e visitaders. L'aura è stada buna – e gia baud han ils fans chattà la via sin l'areal, avant in dals numerus stans ubain davant la tribuna gronda.

Cun il venderdi èn las chaliras vegnidas, ed era in u l'auter urizi hai dà la saira e durant la notg. Tuttina èn anc pliras millis persunas vegnidas a Degen. Musicalmain han «Hess & The Spanky Hammers» procurà per in bun cumenzament e las «Liricas Analas» cun lur concert final per il highlight emoziunal. Tuts concerts han dentant pudì carmalar la glieud or da lur tendas.

La sonda cun e senza tensiun

Era la sonda ha malgrà plievgia e pli bassas temperaturas cumenzà bain. Gia durant ils emprims concerts è ina fulla glieud sa rimnada davant la tribuna. Vers saira èsi lura vegnì in pau caotic en la Lumnezia. L'emprima interrupziun da la forza electrica è capitada be minutas avant il concert da Bastian Baker. In cametg è dà en in isolatur ed ha stgarpà giu ina lingia d'electricitad. Bun in'ura han gidantras e gidanters duvrà fin che l'electricitad ha puspè funcziunà. Cura che Bastian Baker ha sunà hai lura cumenzà a plover. Per ils blers fans n'è quai dentant stà nagin problem.

Pli tard la saira il snuizi per ils organisaturs; in'ulteriura interrupziun durant il concert da «Lo & Leduc» che han stuì rumper giu lur concert. Davos las culissas han ils organisaturs fatg tut per pudair realisar l'ultim concert. Circa las 0:30 uras han ils Scots da Biffy Clyro mess il pe sin il palc e procurà per in final bumbastic e conciliant a Degen.

Ils concerts da la gievgia saira