L’essenzial per far musica è per Martina Linn ina vusch ed ina ghitarra. Dapli na dovri betg per realisar ses album «Skinny Songs». Nagina band ch’accumpogna e nagin schnicschnac uschiglio. Perquai pudess il «Skinny» star per satigl e manidel. «Skinny» pudess era star per l’emoziunal che va sut la pel. I saja tenor la chantautura sezza l'album il pli persunal cun istorgias davart in uffant ch’è sin la tschertga da schurmetg e refugi e d’ina giuvna che cumbatta ils demunis da si’uffanza.
- Morning Light
- Beautiful Garden
- Alles da
- Little Humans in the Night
- My Heart is Good
- La, la, la, la
- Kitchen Song
- The Girl With Velvet Paws
- I Saw You Carry the Moon
- Heut wär ich so gern faul
- Ich fahre wieder Rad
- Original Shearling
Chanzuns en trais linguas
Martina Linn fa indie-folk – in gener che stat per autenticitad, per istorgias e per musica tradiziunala en in vestgì modern. Cun «Skinny Songs» ha ella creà in disc che cuntegna tut quests elements. Surprendent è ch’ella chanta per englais, tudestg da scrittira e tudestg svizzer. Ina surpraisa perquai ch’ella ha cumenzà sia carriera cun discs cumplet per englais (She Is Gone 2013, Pocket of Feelings 2015, What Yesterday Lost 2019) ed ha publitgà il 2023 in album cun chanzuns rumantschas (In tschercha da stizis). Per ses 5avel album ha ella collavurà cun l’autur Tim Krohn ch'ha ragischs en Germania ed abitescha uss en Val Müstair. El ha era gì in'influenza sin la cumparsa da tschertas chanzuns da Martina Linn – betg be cun il tudestg da scrittira, mabain en duas da las chanzuns era cumposiziuns da Tim Krohn.
Quai da las trais linguas è sa dà en collavuraziun cun Tim Krohn. Tudestg svizzer è mi'emprima lingua, tudestg da scrittira ma stat era fitg datiers ed englais tuna simplamain bain.
Pliras chanzuns sa preschentan fitg melodiusas. Malgrà lur caracter reducì enzuglian ellas cun ina cuverta chauda e laschan sa cumblidar cumplet. Tranter quellas per exempel «Morning Lights», «Kitchen Song» ubain «Little Humans in the Night». Autras van en la direcziun da trubadurs svizzers. Chanzuns sco «Alles Da» u «Original Shearling» nua che Martina Linn raquinta istorgias che mettan in pau main pais a la part melodica.
«Skinny Songs» è, sco quai ch’il titel empermetta, in album fitg fin e fitg reducì. Ideal per tadlar durant in viadi cun il tren per observar la cuntrada e siemiar. Per muments ruassaivels e forsa era pensivs – ina bella ed autentica rimnada da chanzuns or da la plima da la chantautura Martina Linn.
