Martina Linn è stada trais mais en l’Engiadina e n’ha l’entschatta betg ponderà ina minuta d’edir in album. Per ella ha quai duì esser in temps nua ch’ella possia esser creativa, scriver musica, far skizzas – in temp d’esser inspirada da la vallada. L’inspiraziun è la finala stada uschè gronda ch’in album da cumposiziuns en la muntogna grischuna è naschì. Quel consista da 10 chanzuns rumantschas.
L’idea dad ir en l’Engiadina per in pli lung temp n’haja betg ella gì mabain in’amia. Linn è stada intgantada dal patratg dad ir en la bella Val Müstair be per far musica e per s’occupar da la lirica rumantscha. Ditg e fatg.
Il resultat èn chanzuns magic-melancolicas, misticas, sfericas, plain tuns e suns da ses gener oriund – da l’indie-folk. Magari han ins schizunt l’impressiun da gist vesair la vasta Val Müstair e la mirvegliusa natira nua che Martina ha laschà inspirar da scriver. Ils texts derivan da las plimas da differents auturs ed auturas, naschids tranter 1824 e 1984, che la musicista ha chattà durant sia tschertga.
- Gian Fadri Caderas
- Anna Ratti
- Madlaina Stuppan
- Rut Plouda
- Jessica Zuan
- Giovannes Mathis
- Artur Caflisch
Tschertgà lirica e chattà sasez
Sin quest viadi d’exploraziun haja ella chattà ses stil da musica e sia expressiun. Savens saja ella vegnida dumandada daco ch’ella publitgeschia pir ussa in album rumantsch. Sin quella dumonda sappia ella mo dir ch’ella saja persvadida ch’igl haja stuì ir uschia sco quai ch’i saja ì ussa. Il viadi dals onns passads ed ils differents stils da musica ch’ella haja tut fatg sajan stads necessaris per chattar sia via – mo entras quel sappia ella esser tar quai punct nua ch’ella saja ussa. Martina sa tge ch’ella vul, co ella e sia musica duess tunar e danunder ch’ella deriva.
Forsa ha la musicista ussa scuvrì ses stil dal cor durant quai process creativ. En scadin cas fa quai emprim album rumantsch gust d’udir dapli da la chantadura e cumponista en sia lingua materna. E tgi sa sch’ils texts da las chanzuns rumantschas èn la proxima giada era scrits da Martina Linn sezza. Plaschair ed interess d’edir in album nua che la musica ed ils texts derivan da l’artista avess ella en scadin cas.
Or da l'archiv
