L'onn 1994 ha Hansruedi Kämpfen inizià e fundà il Schweizer Jugendchor, il Chor da giuvenils svizzer ed è stà fin il 2018 il manader artistic da la furmaziun. Dapi l'onn da fundaziun entusiasmeschan las giuvnas chantaduras ed ils giuvens chantadurs tranter 16 e 26 onns il publicum en ed ordaifer la Svizra. Il chor celebrescha il chant da chors sin fitg aut nivel. Vitiers vala il chor er sco «center da furmaziun da l'elita futura» per la scena da chors svizra. Dapi il 2016 lavura il Bernais Nicolas Fink cun il chor, ed el è dapi il 2018 il manader artistic. Adina puspè ha il chor er envidà dirigents da giast. Uschia ha era Clau Scherrer dastgà direger concerts il 2008 e 2009.
Il chor che dumbra radund 50 chantaduras e chantadurs fa punts tranter las regiuns linguisticas svizras e chanta uschia chanzuns en tuttas quatter linguas naziunalas. Il 2021 ha el per exempel edì in disc cumpact cun il titel rumantsch «Da Nadal notg» (ina chanzun da Gion Antoni Derungs). Er quest onn, per ses giubileum da 30 onns, ha il chor edì in nov disc cumpact: «Messe pour double choeur».
Incantanti & Chor mischedau Surrein
Audituras ed auditurs han pudì esser preschent l'entschatta october a Surrein en la baselgia sogn Placi per tadlar «radio» en la baselgia. L'Ensemble vocal incantanti cun ses dirigent Christian Klucker ha mussà ina prestaziun da vaglia ed incantà.
Enramà la concurrenza ha er il Chor mischedau da Surrein cun sia dirigenta Andrea Schmed Camathias. Ils dus chors han dà in pitschen concert per il public en baselgia e serrà la saira cun intginas chanzuns communablas.
En noss archiv da musica èn da chattar nundumbraivlas registraziuns da chors - en spezial chors rumantschs e grischuns.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.