La musica da la musicista «Saint Stacy» sa cumpona da la fina vusch da la chantadura, melodias tschiffantas e tut quai maschadà e producì en ina moda ruassaivla da siemiar. Kristina, sco la chantautura ha num per propi, na resta betg be tar la musica mabain sa fatschenta era cun art da resti e moda. Uschia creescha ella ses agen stil visual ed auditiv. Tranter 2016 e 2020 ha ella chantà per la gruppa da pop electronic «Kadebostany». Cun els ha ella savì rimnà blera experientscha durant bun 300 concerts en 20 pajais.
Cun ses project da solo e sia single da debut «Purple Vibe» sa ella uss sa preschentar durant il settember en ils radios da RTR, SRF3, Couleur 3 e Rete Tre.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.
