In u l’auter enconuscha forsa anc la band «Serafyn» da Basilea. Avant bun otg onns ha Anna Erhard cun quella band fatg ses emprims pass musicals. Ed era gia savì festivà ils emprims success. Insaquants onns pli tard ha ella fatg il pass el mund d’artista da solo. Sco «Anna Erhard» publitgescha ella dapi 2019 atgna musica. Medemamain ha ella fatg il pass sur il cunfin ora a Berlin. Là scriva e producescha ella nova musica ensemen cun Pola Roy ch’è enconuschents sco commember da la gruppa tudestga «Wir sind Helden». Sia single actuala è «170» – ina dispita sur da la grondezza cun in’amia ch’è saja propi capitada uschia. Cun quella sa ella uss sa preschentar durant l’october en ils radios da RTR, SRF3, Couleur 3 e Rete Tre.
Quai tema è uschè banal, quai na savessan ins gnanc inventar – Quella dispita hai pia propi dà!
Anna Erhard producescha sia musica a Berlin, ha gia savì sa preschentar sin ina turnea en l’Engalterra e sia musica è gia vegnida emessa sin BBC 6 Music en la rotaziun. Tuttina saja quai per ella anc insatge spezial ch’ella vegn promovida en Svizra cun l’acziun Mx3 – tuts per in. En general sentan ins pir en l’exteriur con grond ch’il sustegn per musicistas e musicists en Svizra saja. Quai ha ella tradì durant ina curta intervista che vus pudais tadlar qua:
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.
