Gia l’atun 2023 è la chanzun «Keep You Waiting» da Luca! x JAMILA naschida. En in’intervista cun SRF han la chantadura JAMILA ed il chantadur Luca! tradì co che questa collavuraziun è sa sviluppada. JAMILA ha casualmain chattà la chanzun «Glad» da Luca! en ina Playlist ed è stada talmain intgantada da quella, ch’ella ha scrit a Luca! via Instagram. Sia reacziun è stada la proposta ch’el tramettia ina giada ad ella ina melodia en cas ch’el avess scrit ina che giess a prà – tge ch’el ha lura era fatg. Usche han els scrit la chanzun «Keep You Waiting». Tenor JAMILA raquinta quella da persunas che na san ni na lessan betg sa laschar en sin ina relaziun e che han savens tema da sa mussar vulnerabel. En la chanzun descrivan els la situaziun da duas perspectivas. Luca! raquinta da la persuna che fiss semtgada per ina relaziun e che sa dumonda daco che quai sto esser uschè cumplitgà. JAMILA represchenta l’autra perspectiva, numnadamain quella che na sa betg tge far e na gughegia betg da sa laschar en sin quai. Quai messadi pachetà en ina chanzun da pop «Keep You Waiting» pon els ussa preschentar durant il mars en ils radios da RTR, SRF3, Couleur 3 e Rete Tre.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.
