Zoë Kressler alias Zoë Më ha cun 12 onns gia scrit sias atgnas chanzuns. Sia carriera musicala ha cumenzà avant siat onns cun ina concurrenza dal radio Freiburg. Grazia a quella ha ella pudì prender part al festival Wake’n’Jam a Murten. 2020 ha ella publitgà ses emprim album cun il titel «Momoko». L’atun 2023 ha la giuvna chantadura che abitescha dapi 14 onns a Friburg publitgà la single «Ok». Quella single è part da l’EP che cumpara quest onn. Zoë Më chanta en «Ok» per tudestg e franzos – ch’ella ha stuì emprender franzos na percorschan ins dentant betg. Senza problems mida ella cun chantar tranter quellas duas linguas. Quai po ella uss era demussar en l’entira Svizra durant il schaner en ils radios da RTR, SRF3, Couleur 3 e Rete Tre.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.
