Nyna Dubois, oriundamain da Cuira, abitescha uss a Berna. Il 2004 ha ella gudagnà l’emissiun da casting rumantscha «La vusch 04». Cun «Keys To The Heart» publitgescha ella uss ses quart album. Maria de Val è daventada enconuschenta cun la gruppa ladina Ganes ed il duo Me & Marie. «Mëda Medusa» è l’emprim album da solo da la chantautura dal Tirol dal Sid.
Splendur e traglischur
L’album «Keys To The Heart» è in omagi ad ina passiun che ha accumpagnà Nyna Dubois gia baud: il chant e la musica. Quai saja sco uffant gia stà la clav a ses cor ed in’ancra per sia vita. Ella saja adina stada in zic ina siemiadra cun il chau en ils nivels, e per part cun fadia da sa concentrar. Per survegnir ruaus e puspè sa colliar cun la terra haja ella fatg musica – chantà e sunà cun ses idols musicals da quels temps. Pir avant curt ha ella survegnì la diagnosa ADHS, e cun quai l’evidenza daco ch’ella saja uschia sco ella è.
Tar «Keys To The Heart» hai jau conscientamain inclus quai (l’ADHS) e nizzegià quels muments super impulsivs e creativs per la producziun da l’album.
Cun agid dal producent Ben Mühlethaler – che ha tranter auter era gia lavurà cun il star american Prince ed il pianist britannic Andy Yeates da Calum Scott – ha ella empruvà da transferir questas experientschas sin in disc. Il resultat èn 14 chanzuns englaisas. Ella è restada fidaivla a ses stil da pop, R&B e soul cun presas da disco. La lingua ha ella midà cumplettamain da tudestg svizzer en englais. Ina decisiun che na saja betg stada en emprima lingia strategica, mabain insatge che penda era ensemen cun ses idols musicals ed il tun da la lingua englaisa, sco ella tradescha.
Nyna Dubois davart ses album
Ins senta che Nyna Dubois e ses team han mess blera lavur en quest disc, e ch’els han glimà vi da mintga ballada e mintga chanzun pli sperta. Igl è in album cumplet, radund cun bler glamour – ed in pèr paucs chantuns.
Da tuttas colurs
Chantuns chattan ins ina pluna sin «Mëda Medusa» da Maria de Val. La multiinstrumentalista, la Ladina dal Tirol dal Sid, la battarista en in mund musical dominà dals umens – preschenta in album giagl e plain fantasia. Maria de Val variescha tranter quatter linguas (englais, ladin, talian, tudestg), ballantscha tranter indie-folk, art-pop ed italo-western e fa in viadi musical tras ils onns 70, 90 e 00.
Sin «Mëda Medusa» elavura ella temas da la societad, da relaziuns ed amur e na spargna betg cun critica. Ins sto dentant dar adatg ch’ins na manchenta betg ils texts critics en las melodias allegras. I dovra in mument per chapir quella rimnada da chanzuns – ed i n’è betg insatge che sa mova en il mainstream. Maria de Val para da viver ora sias experientschas da vita sin quest album. Da la figlia mesauna tranter set fragliuns ch’è creschida si en in vitg alpin en las Dolomitas fin a la battarista da bands da rock en citads tudestgas. Igl è in fratem da tut quai che fa plaschair e che ha influenzà l’anteriura chantadura da Ganes e da Me & Marie – in menu che fa gust, ma forsa betg ad in e scadin.
