Cinzia Regensburger è stada il venderdi avantmezdi live tar nus en il studio ed ha preschentà e raquintà da sia nova EP «20's in the 20's» – part 1 cun 6 chanzuns. I vegn anc a dar ina segunda part che suonda l'entschatta 2025 cun ulteriuras 7 chanzuns. Da sia nova EP ha ella chantà live tar nus en il studio «Mantels da giallina» e «Intuorn».
Emprender d’enconuscher
Cinzia Regensburger è creschida si en la Val Müstair. Cun set onns ha ella survegnì regalà in clavazin d’ina professura da musica. Era gia avant han ses geniturs accumpagnà ses dis cun chant e musica. Uschia è la chantautura ch’è ussa a chasa tranter auter a Scuol stada en contact cun la musica da pitschna ensi. Insatge ch’è daventà ina passiun e che na lascha dapi lura betg dar ella.
Ir en sortida
La musica ha manà Cinzia Regensburger en tut differentas regiuns. Tranter auter ha ella scrit, arranschà ed organisà trais musicals («Burlesque», «80s All Night Long» e «Cabaret auf Tournee»). Plinavant hai tratg ella da Scuol fin en l’America a San Francisco. Là ha ella fatg part d’in project cun il «Golden Gate Symphony Orchestra» – dirigent da l’orchester è dal reminent in cun ragischs a Cuira: Urs Leonhardt Steiner. Cinzia Regensburger n’ha betg be fatg musica cun l’orchester mabain era arranschà musica per quel. Per in project spezial ha ella arranschà chanzuns giudaicas ch’èn vegnidas scrittas en champs da concentraziun. Deplorablamain n’ha ella la finala betg pudì far part da quels concerts. Ina rebattida ch’ella ha dentant prendì sco inspiraziun per ina atgna chanzun «Intuorn».
Ils fritgs da la relaziun
«Intuorn» è ina da sis chanzuns che fan part da l’EP «20s in the 20s part 1» ch’è l’emprima part d’in album che cumpara cumplettamain il 2025. Per Cinzia Regensburger è quai suenter 2018 (Impissamaints) e 2023 (In Movimaint) gia il terz album da studio. Cun 25 onns cumbinescha ella sia fascinaziun per la musica ed ils onns 1920 sin in disc. Uschia preschenta quest album ina maschaida da tuns che sgaran sco giu d’ina platta veglia, in clavazin termagliant, tuns da swing ed ina presa teatralitad. Ins vegn tratg en il temp da Charleston, pagliettas e d’extravaganza – ditg curt en ils «Roaring Twenties». Dentant resuna era il temp actual, cun las ghitarras electronicas amez la chanzun critica «Mantels da giallina» ubain en la chanzun «Intuorn».
Ina EP ch’è musicalmain fitg consistenta e per part in zic excessiva – tge che va dentant bain a prà cun ils onns selvadis dal 1920...
