La chanzun populara dal salip e la furmicla è enconuschenta en l'entira Svizra rumantscha e questa chanzun ha inspirà Gion Andrea Casanova da scriver si'emprima ovra per orchester da chombra: «Omagi al salep e la furmicla».
Il 2022 ha Philippe Bach, il dirigent da la Kammerphilharmonie Graubünden, motivà el da scriver in'ovra per orchester. Cunquai ch'el n'haja anc mai scrit in'ovra per orchester haja el vulì cumenzar cun ina cumposiziun per orchester da chombra. La melodia da la chanzun dal salip e la furmicla haja bler potenzial, uschia di Gion Andrea Casanova. Perquai haja el elegì la melodia sco motiv principal per sia cumposiziun.
L'ovra «Omagi al salep e la furmicla» è stada in dals puncts centrals en il concert festiv dals 29 da december 2024 en La Fermata a Falera. Il Lviv National Philharmonic Orchestra of Ukraine e ses dirigent Simon Camartin han elegì per lur program capodovras. Uschia per exempel il «Concertante Nr. 1 für Bläserquintett und Orchester in B-Dur» da Peter Joseph von Lindpaintner. Ils solists en quell'ovra èn: Yevhen Biletskyy (flauta), Stepan Syvokhip (oboa), Hryhoriy Chepeliuk (clarinetta), Andriy Tkachuk (fagot) ed Oleksandr Kholodiuk (corn).
Sper quai ha l'orchester er sunà la sinfonia Nr. 8, h-moll (Unvollendete) da Franz Schubert u ils valsers «Die Romantiker» da Joseph Lanner e «An der schönen blauen Donau» da Johann Strauss (figl).
L'entir concert datti era sin la plattafurma da festas e concerts da RTR: Playfestas.
Or da l'archiv