En il capitel III dal pli nov cudesch da poesias da Arnold Spescha, «Sinzurs el serein dalla sera», deditgescha l'autur pliras poesias a pronoms persunals. Las poesias «Jeu», «Ti» e «Vus» han plaschì fitg bain a Simon Camartin. Quai ha animà il dirigent da Mustér da laschar scriver ina cumposiziun per orchester. L'incumbensa ha el dà a Yuri Laniuk, in cumponist da l'Ucraina.
L'october 2023 ha Simon Camartin dirigì la premiera dal toc «Tezlas» ensemen cun la sopranista Mariana Golovko ed il L'viv National Philharmonic Orchestra of Ukraine da Lemberg. Per quella è el viagià ensemen cun sia dunna Oana en l'Ucraina. In viadi privlus, aventurus e tenor Simon Camartin er snuaivel – dentant en tutta cas in viadi ch'è sa pajà. L’engraziaivladad da l'orchester e dal public saja stada fitg gronda, uschia ha Simon Camartin ditg.
Lunga via a l'ovra finida
Per insumma pudair s'occupar cun las poesias da Arnold Spescha ha Simon Camartin translatà ellas per englais. Vitiers ha Arnold Spescha legì sez e registrà questas trais poesias per che Laniuk audia co che la lingua tuna, nua ch'ils accents e l'intonaziun èn. Uschia ha el pudì scriver in'emprima versiun. Lezza ha gia plaschì bain a Simon Camartin, era Arnold Spescha è stà satisfatg e da buna speranza che quai dettia insatge grondius.
Simon Camartin ha lura stuì curreger intgins «sbagls» ed inditgar a Laniuk nua ch'el na dastgia betg sparter pleds u diftongs e nua ch'el stoppia midar l'accentuaziun dal pled. Ina gronda lavur. Simon Camartin ha quasi fatg ina instrucziun co metter la lingua rumantscha en musica. La finala è quai grategià uschè bain che las musicistas ed ils musicists dal L'viv National Philharmonic Orchestra of Ukraine han ludà l'ovra e manegià che quai saja ina da las meglras che Laniuk haja scrit insacura.
En l'Artg musical èn natiralmain er d'udir ulteriuras ovras che l'orchester ha preschentà a quest concert. Tranter auter ovras da Mozart, Janácek e Klusák.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
