A la Concurrenza svizra dals chors giuditgeschan las giurias en tuttas categorias las preschentaziuns dals chors tenor ils criteris uffizials e las directivas generalas da l'Uniun svizra dals chors:
- a) realisaziun tecnica, intunaziun, ritmica, frasaziun ed articulaziun
- b) realisaziun artistica, mesira dal temp, agogia, dinamica, interpretaziun dal text, fidaivladad al stil, tun dal chor e sugestivitad (=expressiun musicala)
A Cuira han las derschadras ed ils derschaders da las giurias gì da valitar la prestaziun dals chors per lur entir program da 12 fin 15 minutas. Igl è pia da giuditgar divers stils musicals, chanzuns da fitg different gener, pia in giudicament general. In'incumbensa pretensiusa.
L'emissiun sa focussescha sin ils otg chors en la categoria «elita». Ensemen cun ils dirigents Jachen Janett e Clau Scherrer tadlain nus da mintga chor duas chanzuns e discutain lura davart la preschentaziun, la prestaziun ed era davart las sfidas da las derschadras e dals derschaders.
Tant Jachen Janett sco era Clau Scherrer èn era gia stads experts a festas da chant. Cunquai ch'omadus èn era dirigents han els invista en omaduas varts e pon uschia dar invista en quest mund da giuditgar prestaziuns musicalas.
Criteris fitg impurtants
Tranter tut ils criteris datti da quels cun dapli impurtanza, da quels ch'èn pli decisivs per giuditgar la qualitad dad in chor.
A la concurrenza svizra da chors a Cuira ha l'Uniun svizra dals chors elavurà in nov concept da giudicament. Tranter auter ha ella creà dapli categorias da chors ed era adattà il sistem da puncts. Enstagl da 60 puncts sco maximum sco anc a l'ultima concurrenza (2017, Aarau) han ins fixà a Cuira il maximum sin 25 puncts.
Da la giuria che consista da trais persunas ha mintga derschadra e mintga derschader tadlà da mintga chor ses program preparà e lura dà ses puncts. Cura che l'ultim chor d'ina categoria ha terminà ses program è la giuria sa radunada ed ha discutà las prestaziuns. En la categoria d'elita n'èn las opiniuns (puncts) betg stadas lunsch in ord l'auter. Quai mussa era la glista da rangaziun.
Resultats finals
Audios e videos da tut ils chors
Spetgas dals chors
In giudicament d'ina giuria duai natiralmain er esser ina motivaziun per ils chors ed animar els da lavurar vinavant e da meglierar tschertas chaussas. Er ils dirigents han tschertas spetgas en connex cun la giuria.
Il Grischun Martin Zimmermann è stà il capo-derschader. El n'ha però betg funcziunà sco expert a la festa, mabain ha preparà il concept da valitaziun per la concurrenza da chors. Durant ils dus dis da la concurrenza ha el manà ils discurs da las differentas giurias, rimnà ils rapports da mintga singula experta e mintga singul expert, quintà ora la media e preparà la rangaziun. El è cuntent cun la lavur da la giuria.
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
