«Quest guaud è mes lieu preferì per vegnir a ruaus e discutar novas ideas creativas», raquinta Livia Rita dasper la chaplutta da Son Carli Boromeo. La chaplutta saja il lieu d’inscunter, nua che mintgin passia, cura ch’el va tras il guaud si vers il Piz Mundaun. «Dal Bündner Rigi, nua che jau lavur gist uss en la gastronomia ensemen cun mes partenari ed in collectiv, prepar concerts e lavur vi da projects, vegn jau savens en il guaud. Il guaud da Son Carli porscha inspiraziun e quietezza ed insumma bler da quai che jau na chat betg en las citads svizras u en las metropolas europeicas.»
Plirs munds – ina visiun
Livia Rita è creschida si a Nesslau en il Toggenburg ed ha gia retschavì il 2023 in premi da promoziun da la Fundaziun da cultura dal chantun Son Gagl. En discurs cun la FMR ha l’artista ditg ch’ella derivia d’ina famiglia da mastergnants. «Mes tat e mia tatta eran purs e mes geniturs eran omadus scolasts manuals. Nus avain adina zambregià en famiglia.» Livia Rita ha acquistà in bachelor en il studi «Contemporary Performance» a Londra. Sco che la regiun dal Toggenburg scriva l’onn 2023 en connex cun in’undraziun per Livia Rita, s’occupa l’artista da la creaziun da munds mitologics, d’atmosfera immersiva e d’istorgias emoziunalas palpablas. Livia Rita sezza di che sias ovras cumplettas cuntegnian pliras ingredienzas, ma quasi adina musica.
Jau lavur dentant er sco coreografa, cineasta ed artista visuala.
Quai sajan per exempel installaziuns ed er ina sort fashion, texturas e sculpturas purtablas che scuvran novas identitads.
Musica generescha maletgs
«Mias ovras ch’èn adina ina rait da pliras disciplinas artisticas han savens la musica sco basa», di Livia Rita che porta era il num d’artista Livia Rita. «Mintga ovra che nascha en mes atelier ha sco basa in text da chanzuns.» Ella insceneschia dentant naginas producziuns che sajan gia dadas. Sia fermezza saja da s’inscenar ensemen cun ses mund, di l’artista che survegn in dals tschintg premis da promoziun da la regenza grischuna. «En l’avegnir fatsch jau dapli exposiziuns cun in focus pli ferm sin ils maletgs. Là èn ils aspects visuals excepziunalmain pli impurtants che la musica.»
Averta per contacts
Sia giuventetgna ha Livia Rita passentà en ina regiun rurala. Ses studi d'art ha ella fatg a Londra. Ella di ch'ella viageschia permanentamain vi e nà tranter il mund rural pitschen e ruassaivel e las metropolas europeicas.
D'esser colliada cun il mund grond e stretg ma dat l'occasiun d'esser creativa e da viver pli intensivamain la vita.
Ella saja adina a la tschertga da contacts per discurrer da l'art. Quai tant sin il Bündner Rigi sco era en las grondas citads. «La dumonda co che jau poss cuntanscher umans cun mes art e co che jau poss parter mias ovras cun auters ma fascinescha fitg.»
-
Bild 1 von 4. Bildquelle: Simon Habegger.
-
Bild 2 von 4. Bildquelle: Toma.
-
Bild 3 von 4. Bildquelle: Mess a disposiziun.
-
Bild 4 von 4. Bildquelle: mess a disposiziun.
Giavischs datti blers
Sch’ella pudess giavischar da realisar in’exposiziun u ina performance x-insanua sin il mund, lura fiss quai en ina da las grondas salas u tribunas en citads europeicas. Gugent sa participass ella ina giada al festival a Glastonbury ch’è in dals gronds festivals da musica en l’Engalterra. Ma era en Surselva dettia lieus ch'interessassan ella. Ella faschess gugent ina giada ina performance en ina sutgera. Là inscenass ella in sgol che vegn accumpagnà d’elements da suns e tuns.
Ina gronda surpraisa
«Jau n’hai strusch pudì crair ch’jau saja nominada per in premi da promoziun dal chantun Grischun», di l'artista Livia Rita.
Quai è ina mega gronda onur per mai.
Ella haja adina pensà d’esser en Surselva, en in lieu nua che paucas persunas prendan notizia da la lavur artistica. Ella suppona che sia tenuta averta per il nov e ses plaschair da fascinar autras persunas per l’art sajan stads criteris decisivs per il gremi ch’ella ha tschernì.
La regenza grischuna scriva ch'ella dettia in premi da promoziun a Livia Rita perquai ch'ella collia la lingua, la musica, il dissegn da tribuna, ses corp e ses engaschament per il clima ad in'ovra d'art cumplessiva che veglia midar il mund a moda sensitiva e cun blera fantasia.
