La Regenza surdat a Walter Lietha da Trin il Premi grischun da cultura 2025. Il premi è dotà cun 30 000 francs. Cun chanzuns politicas pregnantas e cun musica virtuosa enritgescha il poet, cumponist, chantadur e ghitarrist da Trin il sentiment da vita da trais generaziuns. Sco editur e sco collecziunader da cudeschs passiunà procura el decisivamain che l'istorgia culturala e d'art dal Grischun vegnia conservada.
Plinavant surdat la Regenza otg premis da renconuschientscha e tschintg premis da promoziun da mintgamai 20 000 francs.
Premi da renconuschientscha 2025
Martin Cabalzar, schurnalist/politicher da cultura/etnograf, Cumbel, 1956
La Regenza surdat a Martin Cabalzar in premi da renconuschientscha. El ha marcà la pressa rumantscha, el è in politicher da cultura fitg engaschà, e sco etnograf ha el scrit in cudesch original davart sia val – la Lumnezia.
Rolf Caflisch, musicist da jazz/organisatur d'occurrenzas da jazz, Cuira, 1978
Rolf Caflisch è in battarist da jazz virtuos ed ina persuna-clav briglianta dal jazz en il Grischun. Grazia ad el datti – da e per Cuira ed il Grischun – jazz che resplenda lunsch sur ils cunfins chantunals ora.
Cinema sil Plaz, Glion, fundà il 2010
La Regenza surdat al Cinema sil Plaz a Glion in premi da renconuschientscha. A sia uniun èsi gartegià d'organisar cuntinuadamain in program da cultura varià en in bel lieu.
Begoña Feijoo Fariña, scriptura/organisatura d'occurrenzas culturalas, Poschiavo, 1977
Da la Galizia è ella arrivada en il Puschlav, scriva romans, fa teater e procura per ina festa da teater e litteratura en sia val.
Riikka Läser, sautunza/coreografa, Zuoz, 1978
Ella è ina sautunza e coreografa che ha success sin plaun internaziunal e che turna adina puspè a chasa en l'Engiadina ed organisescha teaters sautads.
Jon Mathieu, istoricher, Burgdorf/Valsot, 1952
El ha scrit cudeschs fitg impurtants davart l'istorgia da l'Engiadina Bassa e da las Alps e s'occupa en moda multifara per il bainstar da la vischnanca da Valsot.
Casper Nicca, filmader/fotograf/musicist, Donat, 1968
L'artist visual Casper Nicca survegn in premi da renconuschientscha da la Regenza. El producescha films da purtrets e da reportascha extraordinaris, sco fotograf al reusseschan documentaziuns e maletgs commovents davart furmas da viver e cuntradas en las muntognas – ed el è in musicist talentà da tuns esters.
Dominik Zehnder, sculptur, Cazas, 1973
Cun ina scolaziun solida sco tagliacrappa e sculptur da crappa collia el marmel, crap e fier cun sias ideas ad art contemporan. Ed ils spazis en ils vitgs dal Grischun enritgescha el cun bigls e cun art a l'edifizi.
Premis da promoziun 2025
Livia Rita Heim, performra/musicista/designra, Surcuolm, 1992
Livia Rita collia la lingua, la musica, il design da costums e da tribunas, ses agen corp e l'engaschament per la politica climatica ad in'ovra d'art cumplessiva che vul midar il mund en moda plain fantasia e captivantamain sensuala.
Noemi Adam-Graf, linguista, Trin, 1991
La linguista retschertga la plurilinguitad dal Grischun, ella perscrutescha, docescha, scriva ed organisescha dietas.
Anita Dachauer, musicanta da musica populara, Saas, 1995
La musicanta da musica populara è ina virtuosa cun l'orgelin e sco chantadura. Ella construescha ils instruments per ses art ed intermediescha als uffants la musica populara ed il saut.
Silvie Noemi Demont, artista/designra da moda, Cuira/Lucerna, 1996
L'artista d'art figurativ e designra da moda collia en moda virtuosa la critica envers l'industria da textilias cun ses projects artistics textils, e cun ses label da moda metta ella vestgadira en circulaziun.
Cinzia Regensburger, musicista, Scuol, 1999
La Regenza surdat a Cinzia Regensburger in premi da promoziun. La pianista, cumponista, chantadura, performra ha gronds plans.