Millis e millis da giuvnas e giuvens midan onn per onn da la scola obligatorica en la vita professiunala – in pass betg simpel. Anc pli grev èsi per uffants cun in impediment. Ina giada dapli èn dumandads ils geniturs da s'orientar en in mund be prescripziuns, administraziun e leschas.
Perquai è il cussegl, ch'il chantautur e bab dad in figl cun sindrom da down dat a geniturs pertutgads cler:
Mes cussegl: Betg dar si!
Il chantautur da Scharans sa da tge ch'el discurra. Ensemen cun sia dunna ha el tschertgà trais onns per chattar in lieu, che correspunda a lur figl Liun (17).
Uss sa Liun lavurar e viver sin in bain puril spezialisà en il chantun Turitg. Là gida el da tgirar las vatgas ed auters animals e sa lavurar tar la producziun da verdura. Ina spierta, ch'i na dettia betg uschia en il Grischun, ha raquintà Linard Bardill.
Betg gidar tar ina plazza, ma tras la dschungla administrativa
Ina survista da las pussibilitads grischunas po porscher l'organisaziun Procap. Er ella è confruntada onn per onn cun la tschertga da soluziuns professiunalas per giuvnas e giuvens cun impediments.
L'organisaziun da sustegn per persunas cun in impediment na sa betg procurar per in lieu da scolaziun u in dachasa adequat per ils giuvenils, quinta la cussegliadra e spezialista per assicuranzas socialas Monika Padrutt. Ella po dentant prender ils geniturs per il maun tras la dschungla administrativa da pussibilitads e prescripziuns.
Co vinavant suenter la scolaziun – in'occurrenza ed in video
Ina spierta d'infurmaziun e barat da la Procap è il forum da geniturs annual. A Giuvaulta ha el gì lieu quest onn per la tschintgavla giada. Il tema dals referats, la discussiun al podium e la discussiun publica suenter era «Co vinavant suenter la scolaziun obligatorica?».
Per tgi che n'ha betg savì esser da la partida datti in video da l'occurrenza sin la pagina da la Procap en la rait.