La terza ediziun dal Di dal sport Grischun è stada in success. Radund 100 uniuns han preschentà en set lieus lur purschidas a la populaziun. Ils organisaturs, Grischun Sport e la federaziun grischuna per sport tiran ina bilantscha positiva. Tuts hajan fatg ina grondiusa lavur da preschentar las differentas disciplinas da sport ed hajan lavurà bain ensemen, di Thomas Gilardi, president da la Federaziun da sport. La populaziun ha la sonda tranter auter pudì empruvar ora a Cuira co ir cun Kajak ed a Tavau è vegnì lutgà. Ed a Ftan han persunas cun impediments pudì far differents sports.
Al di da sport grischun che vegn organisà en differents lieus en il chantun vai oravant tut per sa preschentar. Societads ed uniuns da biatlon, hockey, atletica leva, da bike e bler auter vulan animar e fascinar persunas singulas, famiglias e persunas cun in impediment da far sport.
Di da sport grischun a Ftan
L’instituziun privata Movimento a Scuol, nua che abitan persunas cun in impediment spiertal, psichic u corporal è sa participada e cun els era ina gruppa dal Vnuost.
Cun grond plaschair, cun bler engaschament han els pudì empruvar a rampignar, pudì trair cun il schluppet da biatlon e bler auter pli. Ina finamira saja l’integraziun ma era la fascinaziun per in sport, uschia la manadra da Movimento a Scuol, Corinne Pedotti. E quai è reussi, cun agid da lur accumpagnadras e accumpagnaders han els gì in di plain moviment e plaschair da cuminanza.
