En ils megliers onns eran ellas 200 soras en la claustra sin la spunda sur Glion. Oz èn ellas anc 66 soras e la media da vegliadetgna è 86 onns. La fin da lur communitad è previsibla. Perquai èn las soras daventadas activas. Ellas han engaschà il biro DXMA, in biro spezialisà per la reutilisaziun dad immobiglias, da sviluppar ideas, co duvrar l’edifizi da la claustra en l'avegnir.
Nus essan pertschertas che l’avegnir en claustra vegn a sa midar.
Ils spazis claustrals
-
Bild 1 von 4. La curt da la clausura (tract da las soras). La priura generala, sora Annemarie, maina Niels Lehmann (il manader dal project per la reutilisaziun da la claustra) tras la claustra. Bildquelle: RTR.
-
Bild 2 von 4. La stanza da la soras. La stanza da las soras è 5x2,5m gronda, ella ha in lavabo ed in balcun. La statica da la claustra lubescha da rumper or paraids ed entras quai engrondir ils spazis per in nov diever. Bildquelle: RTR.
-
Bild 3 von 4. La biblioteca. L’entir edifizi claustral è construì tenor in raster da 2,5x5m. La grondezza da la stanza da las soras sa repeta en la biblioteca. Grazia a quest raster è il bajetg da la claustra predestinà per auters dievers. Bildquelle: RTR.
-
Bild 4 von 4. Il pastrign. Fiss forsa il pastrign cun sia preziusa vesta in lieu adattà per crear en l'avegnir ina nova dimora per las soras? Il manader da project Niels Lehmann dat emprims impuls. Bildquelle: RTR.
Daco essas Vus entrada en claustra?
Ils giavischs
Il giavisch da la soras è da pudair restar en lur claustra enfin la fin. Cunquai ch’ellas èn adina pli paucas e dovran adina damain plaz giavischan ellas en claustra in nov lieu nua ch’ellas pon puspè viver ensemen pli cumpact. Per ils spazis che vegnissan tras quai libers pudessan ellas s’imaginar abitaziuns per pliras generaziuns e per attempads, ina chasa da tgira regiunala. En ils spazis da la chasa da sentupada (Haus der Begegnung) ed il tract da scola (enfin il 2028 dà a tschains al Center da furmaziun Surselva) fiss in center da furmaziun e scolaziun pussaivel. Il grond giavisch da las soras per lur claustra: Projects da vita communabla che portan enavant lur ierta, la filosofia dominicana da scolaziun, furmaziun e tgira.
La claustra da Glion è in juvel architectonic, sia structura è sco fatga per dovra ella er autramain.
Il mintgadi
Avant 60 onns cura che las soras èn vegnidas a star en il nov edifizi claustral faschevan ellas practicamain tut las lavurs da tegnairchasa. Oz na dovran ellas betg mo sustegn per ils servetschs tecnics, mabain era en cuschina, per schubregiar e per la tgira. Passa 80 persunas externas lavuran en claustra.
Uschè ditg ch’jau pos, ma gid jau gugent.
Lavurs en claustra
-
Bild 1 von 4. sora Berta. Sora Berta è ina da las paucas soras che po anc sa gidar cun las lavurs da tegnairchasa da la claustra. Bildquelle: RTR.
-
Bild 2 von 4. sora Placida e sora Ermelinde. En l’anteriura stanza da cuser vegn uss la rauba da las soras che moran zavrada. Quai ch’ellas na dovran betg pli sezzas dattan ellas alla organisaziun Osteuropahilfe. Bildquelle: RTR.
-
Bild 3 von 4. Nicole Stiefenhofer e sora Armina. Las soras vegnan adina pli paucas, lur vuschs pli veglias e l’udida va enavos. Perquai sa gida Nicole Stiefenhofer cun il cant da las vespras. Bildquelle: RTR.
-
Bild 4 von 4. Gruppa da fazielets. Preparar ils fazielets bletschs per far or cun il fier, quai è ina da las lavurs che las soras attempadas pon anc far communablamain. Bildquelle: RTR.
Cuntrast Mustér – ina claustra cun ina generaziun giuvna
Ina da las paucas claustras che guarda actualmain cun optimissem vers il futur – è la claustra dals benedictins a Mustér. Malgrà ina plitost pitschna cuminanza da 19 confrars n’è l’avat Vigeli Monn betg preoccupà. Quai perquai che la vegliadetgna media en sia claustra è cun var 56 onns in bun toc pli bassa ch'en autras claustras – tschintg dals 19 paders a Mustér han sut 35 onns. Vinavant hajan els ils davos onns adina puspè gì novas vocaziuns. Dapi il november hajan els in giuven candidat ed il matg vegnia gia il proxim giuven che vul chattar ora sch’el vul daventar in pader benedictin.
Era sch’il dumber da confrars saja sa sminuì ils davos onns manegia l’avat, ch’i giaja dretg stupent cun els. Ed era sche claustras dad umens hajan en general anc dapli vocaziuns en Svizra che claustras da dunnas, na tanschia quai evidentamain betg per segirar il futur, cunquai ch'era bleras claustras dad umens en Svizra pateschian.
Tar il recept da success da la claustra da Mustér tutga ch’els sajan ina cuminanza averta che tschertga a moda proactiva il contact cun la glieud. L’avat trametta adina puspè ses confrars ad eveniments da la giuventetgna catolica. Quai portia fretg e cunquai ch’els hajan plirs paders pli giuvens, saja lur claustra era pli attractiva per auters giuvens.
Che l’avat Vigeli Monn po guardar cun optimissem vers il futur saja per el in regal da surengiu – ed el è fitg pertschert dal fatg che quella situaziun è fitg extraordinaria per ina claustra en Svizra.