Co sa prepar'ins sin discurs cun autras culturas? Tge reglas valan en l’exteriur? Co ir enturn cun pajais ch’han tut autras ideas? Tge èn las sfidas e tge portan tals viadis a la politica Svizra? Quellas dumondas avain nus fatg al cusseglier federal Ignazio Cassis. Nus avain dentant era discurrì cun il pilot dal jet dal Cussegl federal, il schef da communicaziun dal minister da l'exteriur e l'organisatura dal viadi ch'è planisà sin la minuta.
Impressiuns
-
Bild 1 von 11. Bler temp per baiver café na datti betg sin in viadi en l'exteriur. Il program è plain. Bildquelle: Departament federal d'affars exteriurs.
-
Bild 2 von 11. Bildquelle: RTR.
-
Bild 3 von 11. Tranter auter è il minister da l’exteriur Ignazio Cassis è viagià en Rumenia per suttascriver contracts da cooperaziun. Bildquelle: RTR.
-
Bild 4 von 11. I va per projects da 211,5 milliuns francs che la Svizra finanziescha per il svilup dal pajais en il sidost da l’Europa. Bildquelle: RTR.
-
Bild 5 von 11. Il minister da l'exteriur inscuntra il minister da l'exteriur. Bildquelle: RTR.
-
Bild 6 von 11. En il cudesch da giasts vegn regurdà al viadi. Bildquelle: RTR.
-
Bild 7 von 11. I va dad in lieu a l'auter, d'in inscunter a l'auter. Bildquelle: RTR.
-
Bild 8 von 11. Bildquelle: RTR.
-
Bild 9 von 11. Suenter ils inscunters cun auters ministers dattan quels era pled e fatg a las medias. Bildquelle: RTR.
-
Bild 10 von 11. Visita en l'ambassada svizra en Rumenia. Bildquelle: RTR.
-
Bild 11 von 11. L'attenziun per il vis a vis sto esser da bun'ura fin saira adina 100%. Bildquelle: RTR.
Viagiar per il pajais
Durmir avunda e mangiar sanadaivel: quai èn ils cussegls dal cusseglier federal Ignazio Cassis per surmuntar intensivs e lungs dis da lavur malgrà jetlag sch'ins è sin viadi en l'exteriur. Tenor il minister da l'exteriur Ignazio Cassis as spargna temp sch'ins è en gir cun il jet dal Cussegl federal. Quel è pli spert ch'in aviun da lingia. Sch'ins po spargnar in pèr uras, han ins quellas suenter per discutar ils ultims detagls per la visita u per elavurar auters affars ch'han da vegnir fatgs. Quai èn uras custaivlas ch'ins gudognia, di il cusseglier federal. Impurtant saja il jet oravant tut per sgols en l'exteriur. En il jet pon ins discutar e sa barattar avant ch'il viadi sco tal va liber. Sutvart intginas impressiuns dals onns passads or dal jet (galaria da SRF).
Viagiar per il pajais (SRF)
-
Bild 1 von 6. En il jet dal Cussegl federal vegnan manads discurs impurtants. Uschia p.ex. il mars 1991, cura che cusseglier federal Adolf Ogi (a dretga) discuta en il Falcon 900 cun l'ambassadur Jakob Kellenberger (a sanestra). Bildquelle: Keystone.
-
Bild 2 von 6. Ils 28 da favrer 2000 è il cusseglier federal Joseph Deiss sgulà ensemen cun sia dunna en il Proxim Orient en l'aviun dal Cussegl federal. Qua sgolani da Cairo per ina visita a Luxor. Bildquelle: Keystone.
-
Bild 3 von 6. Era cusseglier federal Pascal Couchepin (dretg) ha discutà en il jet. Qua ils 3 da november 2002 sin il sgol da Genevra a Londra cun schurnalistas e schurnalists. Bildquelle: Keystone.
-
Bild 4 von 6. Ma era baiver café ha plazza: la cussegliera federala Micheline Calmy-Rey sin viadi a Helsinki ils 29 da schaner 2003, nua ch'ella ha inscuntrà il primminister da la Finlanda ed il minister da l'exteriur da la Finlanda. Bildquelle: Keystone.
-
Bild 5 von 6. Cusseglier federal Samuel Schmid, schurnalist da la NZZ Hanspeter Mettler, l'ambassadur Raymond Kunz ed il divisiunari Markus Rusch (da sanestra a dretga) ils 4 da matg 2008 en il jet dal Cussegl federal sin il sgol da return da Kinshasa a Berna. Bildquelle: Keystone.
-
Bild 6 von 6. Er en l'Etiopia è stà il jet dal Cussegl federal: La presidenta da la Confederaziun Simonetta Sommaruga ha visità il pajais cun la finamira d'extender ed approfundar vinavant las relaziuns bilateralas cun la Svizra. (24-10-2015). Bildquelle: Keystone.
Sch'ins guarda sin la statistica da sgols è Ignazio Cassis quel che sgola il pli bler dals set cussegliers federals. Quai che na fa betg surstar sco minister da l'exteriur. Il 2024 ha el fatg 74 sgols cun il jet. I suonda Viola Amherd cun 66 sgols. Dapli che la mitad eran sgols interns. I suonda il Cusseglier federal Beat Jans cun 33 sgols ed il rest da la regenza è sgulada tranter 10 e 20 giadas cun il jet.
La communicaziun
Tenor il cusseglier federal Ignazio Cassis èsi insatge dal pli impurtant ch'ins ha l'endretga glieud enturn sai. Ed adina sin ils chaltgogns dal cusseglier federal è ses schef da communicaziun Nicolas Bideau. Dasper la communicaziun sin il viadi capitan er anc autras chaussas sin il mund. Ins stoppia adina esser tant sin il viadi co era tar tut ils auters temas che succedan e pertutgan il departament.
I na saja betg adina simpel da chattar la bilantscha tranter quai che las medias vulan e quai ch'è meglier per la politica svizra. Els communitgeschan sut il motto: «Sche nus avain insatge da dir, lura faschain quai.» Ma i dat era muments nua ch'igl è meglier da dir nagut, di Nicolas Bideau. Impurtant saja ch'ins possia far il pass enavos sch'i dat in'agitaziun ed ins studegia tge che fetschia senn per la Svizra.
Organisar viadis
Ella è quella che guarda sin l'ura e procura ch'il cusseglier federal è adina là nua ch'el sto esser en quest mument. Sch'in cusseglier federal u ina cussegliera federala vegn sin visita è quai in'organisaziun da mais ordavant, declera Mirela Lungu, collavuratura da l'ambassada Svizra en Rumenia. Per ella èsi dentant adina interessant d'organisar tals viadis era sch'igl è fitg intensiv. Ella na dorma quasi nagut durant ch'il minister da l'exteriur è sin visita. Insatge saja adina d'organisar, di la dunna da la Rumenia.
Ella è cuntenta da lavurar cun differentas culturas. Fitg interessant per organisar viadis saja ch'ins s’ancorscha la differenza sch'ins organisescha in viadi per in cusseglier federal da la svizra taliana u da la svizra tudestga. Ils svizzers tudestgs sajan pli stricts. Ella lavura gugent cun persunas che derivan da culturas latinas cunquai che la cultura e la lingua rumena sajan sumegliantas.
Il nov jet dal Cussegl federal
Sco «palazi da l’aria» è el vegnì titulà: il nov jet dal Cussegl federal, in Bombardier Global 7500. Dapi quest onn fa el kilometers en l’aria. 103 milliuns francs ha el custà e procurà cun quai per intginas lingias grassas. En il mintgadi saja il jet in instrument impurtant da lavur per la regenza svizra, declera Ignazio Cassis. Il sgol en Rumenia era in dals emprims sgols cun il nov jet.
Aviun dal Cussegl federal
-
Bild 1 von 6. Il nov jet dal Cussegl federal: Bombardier Global 7500. Bildquelle: Keystone.
-
Bild 2 von 6. Bildquelle: Aviatica militara .
-
Bild 3 von 6. Bildquelle: Aviatica militara .
-
Bild 4 von 6. Bildquelle: Aviatica militara .
-
Bild 5 von 6. Bildquelle: Aviatica militara .
-
Bild 6 von 6. Bildquelle: Aviatica militara .
Il pilot da la regenza
Dus pilots ed ina stuardess accumpognan ils sgols dals cussegliers federals. Els tgiran l’aviun e fan tut quai ch'ina entira crew fa uschiglio. Il pilot Hansueli Bänziger lavura dapli il 1993 tar l’aviatica militara ed il servetsch da transport en l’aria fa el dapi il 2002. Tar ils gols che Hansueli Bänziger fa èn var in terz sgols cun cussegliers u cusseglieras federalas. Tar sia lezia tutgan dentant era sgols d’agid da catastrofas, evacuaziuns u era sgols da repatriaziun. Per el èsi cler che tut ils giasts survegnan il medem service. Quai era sche sgols cun il Cussegl federal attiran dapli attenziun mediala.
Rumantsch en Rumenia
En il rom da l’emna rumantscha ha il minister da l'exteriur, Ignazio Cassis, festivà la Rumantschia e la plurilinguitad en Rumenia. Quai dasper visitas politicas. Ils temas sin l'agenda dal viadi en Rumenia èn stads la guerra en l'Ucraina e las relaziuns cun l'Uniun europeica. Il minister da l’exteriur Ignazio Cassis è viagià en Rumenia per suttascriver contracts da cooperaziun. I va per projects da 211,5 milliuns francs che la Svizra finanziescha per il svilup dal pajais en il sidost da l’Europa. Il viadi sez è però oravant tut stà sut l’ensaina da las minoritads.