Lur butin sun jets, lur territori preferì è la plazza aviatica Samedan: ils dus Engiadinais Fabian Walther e Hansjörg Pfäffli s'inscuntran sin l'Engadin Airport a Samedan per observar e fotografar aviuns.
Spotter vegn dal pled englais «to spot» che vul dir tant co observar. Spotters èn persunas che observan fenomens da tut gener – tranter auter er aviuns. Il hobi da planespotting ha ses origin en la Segunda Guerra mundiala.
Oz datti in dumber considerabel da planespotters en tut il mund. Els van là nua ch'ils aviuns èn e documenteschan lur observaziuns. Fertant ch’ils ins noteschan be ils numers dals aviuns, èn auters fotografs u fotografas passiunadas.
In hotspot per planespotters è la plazza aviatica da Samedan.
Fertant ch'il scolar Fabian Walther ha ses brevet da spotter pir dapi Nadal è Hansjörg Pfäffli ina veglia lieur en observar e fotografar aviuns.
La passiun che maina enturn il mund
Hansjörg Pfäffli stat dapi radund 40 onns a Puntraschigna. Che la plazza aviatica da Samedan è mo intginas minutas davent da ses dachasa è in grond plaschair per el. Uschia sa el ir a fotografar aviuns precis cur ch'el vul – e cura ch'ils jets exclusivs da la clientella da jetset da San Murezzan arrivan. A chasa ha el gia ina collecziun da 40'000 fotografias da 679 plazzas aviaticas da tut il mund.
Ils pli bels da Hansjörg Pfäffli a Samedan
-
Bild 1 von 5. La Super Constallation svizra HB-RSC en visita a Samedan il 2013. Bildquelle: Hansjörg Pfäffli #hjppics.
-
Bild 2 von 5. L'aviun da transport tactic C-27J Spartan il 2021 tar in sgol da trenament autalpin a Samedan. Bildquelle: Hansjörg Pfäffli #hjppics.
-
Bild 3 von 5. In aviun dal tip British Aerospace Avro RJ85 sut il numer HB-IXG en possess da la societada aviatica Crossair. Bildquelle: Hansjörg Pfäffli #hjppics.
-
Bild 4 von 5. La Gulfstream G650ER dad in possessur privat tar ina visita a Samedan. Bildquelle: Hansjörg Pfäffli #hjppics.
-
Bild 5 von 5. La OY-NCP British Airways Fairchild Dornier Do-328Jet il 2020 a Samedan. Bildquelle: Hansjörg Pfäffli #hjppics.
Sco Hansjörg Pfäffli han en tut 157 spotters il dretg spezial d'ir sin l'apron da l'Engadin Airport. L'apron – quai è il lieu, nua ch'ils aviuns manevreschan – vegnan chargiads e stgargiads e nua ch'i parcheschan.
Il brevet per la plazza aviatica la pli auta en l'Europa
Per pudair far da planespotter a Samedan drovi in brevet. Quel è cunzunt necessari pervi da la segirezza. Sin la pagina da la plazza aviatica pon ins emprender quai ch'è necessari per far il brevet en teoria. Cura che quel è fatg hai num far la visita direct sin la plazza e sa laschar testar d'in spotter-guide.
Ils pli bels da Fabian Walther a Samedan
-
Bild 1 von 5. Quest Airbus a320-232 (WL) ACJ Prestige cun il numer A6-SHJ è stà en visita il schaner. Bildquelle: Fabian Walther/ #swiss_lego_airplane_moc.
-
Bild 2 von 5. Bildquelle: Fabian Walther/ #swiss_lego_airplane_moc.
-
Bild 3 von 5. Ed er quest Airbus a318-112 (CJ) Elite cun il numer 9H-ICE è stà il schaner a Samedan. Bildquelle: Fabian Walther/ #swiss_lego_airplane_moc.
-
Bild 4 von 5. Bildquelle: Fabian Walther/ #swiss_lego_airplane_moc.
-
Bild 5 von 5. Bildquelle: Fabian Walther/ #swiss_lego_airplane_moc.
Quest brevet ha era fatg Fabian Walther da Champfèr. Il scolar è fascinà dal sgular e da l'aviatica. Ina giada vul el daventar sez pilot. Il pli gugent faschess el la licenza directamain en l'Engiadina. Actualmain è Fabian Walther adina puspè sin la plazza aviatica a fotografar.
L’Engadin Airport LSZS a Samedan di, ch’el è cun 1’707 meters sur mar la plazza aviatica la pli auta da l’Europa. En las Alps franzosas platgan percunter a Courchevel aviuns sin 2’007 meters sur mar. La differenza: Courchevel LFLJ sa numna sez Altiport. Tenor experts è quai – ensemen cun il traffic fitg different sin las dus plazzas – raschun avunda per che Samedan possia propi valair sco la plazza la pli auta da l’Europa.
A Samedan pon er atterrar e partir jets d'ina grondezza d'in Airbus A320 u ina Boeing 737 BBJ. En Europa n’è quai pussaivel sin nagin’autra plazza autalpina che a Samedan. A Courchevel datti ina pista che na permetta betg manevers aviatics sco in «go-around». A Samedan pon ils aviuns percunter vegnir da l'ost e dal vest e perfin accelerar puspè avant che platgar e reprender autezza – apunta, far in «go-around».