L'uschenumnà «FOMO» (Fear of Missing out) – è la tema da manchentar insatge. Quest fenomen è daditg dapli che mo in trend en las medias socialas. En ina societad che viva da cumparegliaziuns permanentas pari bunamain nunpussaivel da betg survegnir l'impressiun ch'i dettia adina anc ina meglra pussaivladad.
Jau pens che ti es pir cuntent cura che ti es al punct che ti sas che ti na dovras atgnamain nagut. E sche ti poss daventar tut u avair tut, è quai exact il cuntrari.
Per exempel han psicologas e filosofs chattà ora: sche nus carstgauns avain bleras opziuns, saja bler pli difficil d'esser cuntent cun la decisiun. Questa frustraziun datti, perquai che decider munta en quest mument da desister da tut tschellas pussaivladads. In exempel concret ch’jau hai udì: Sche ti stoss decider tranter tschintg pèra chalzers, è quai pli simpel, che da chattar ils perfetgs chalzers tranter 300 pèra. Là has ti adina il sentiment ch’i avessi dà in chalzer che fiss stà anc pli adattà.
Per mai n’èsi betg da chattar insatge meglier mabain d’empruvar ora insatge nov e guardar sche quai plaschess era. Quai na vul betg dir che quai che jau hai fatg avant n'ha betg plaschì.
Trais persunas – trais vias
En questa reportascha vi jau mussar co Rafael Müller, Laurin Luzio ed Eva Gaudenz van enturn cun la sfida d'avair bleras opziuns ed ils dubis d'avair elegì la meglra varianta. Davent d’empruvar ora massa differents jobs enfin a savair gia da pign ensi, tge ch’ins vul daventar in di.
Sch’igl era ina buna u ina schletta decisiun san ins pir dir en intgins onns en il futur.
Sche ti vul savair tge che Laurin, Rafael ed Eva han da raquintar e tge che jau hai emprendì durant questa reportascha – lura guarda mes Clic! :)
