20-10-2024
Segunda victoria anc pli clera cunter Neuchâtel
Suenter il cler 4:0 da la sonda han las Ladies da Tavau mussà ina anc meglra prestaziun la dumengia. Ellas han battì Nêuchatel a chasa cun 7:0. Ils gols han fatg Courtney Kollman (1:0 e 7:0), Lucienne Tennenbaum (2:0 e 4:0), Xenia Balzarolo (3:0 e 6:0) e Joelle Fiala (5:0). Trais gols han las HCD Ladies fatg en il prim terz e lura mintgamai dus en il segund e terz terz. La giugadra da Sent, Sandra Schmidt ha survegnì in chastì da duas minutas perquai ch'ella ha dà memia grob. En la tabella è Tavau uss sin il terz plaz.
19-10-2024
Victoria suverana cunter Neuchâtel
Suenter la sconfitta l'emna passada suonda quest di ina victoria. Las HCD Ladies gudognan cun 4:2 a chasa cunter la Neuchâtel Hockey Academy. Gia suenter 10 minutas han las Grischunas fatg dus gols. Il segund terz e l'entschatta dals terz terzs era in pau pli quiet. Las davosas tschintg minutas èn anc crudads trais gols, dus per la squadra da Tavau.
La giugadra dal di vegn ad esser Elizabeth Lang. L'attatgadra ha fatg trais dals quatter gols per Tavau.
12-10-2024
Quest gieu n'era betg tenor il gust da las HCD Ladies. A chasa perdan ellas cun 2:3 cunter il SC Berna. Suenter 14 minutas stevi schon 0:2. Plirs chastids cunter las Grischunas han franà lur gieu. L'emprim gol per las HCD Ladies è crudà en las 14avla minuta, fatg da Leoni Balzer. Suenter in segund terz quiet ha suondà in davos terz plain acziun.
05-10-2024
Las HCD Ladies gudognan la partida ordaifer cunter las dunnas dal EHC Langenthal cun 3:0. En la tabella èn las dunnas dal HCD uss sin plazza dus cun 13 puncts, in punct davos las dunnas dal EV Zug.
03-10-2024
Il resultat è stà stretg, cun 3:4 han las dunnas dal HCD la finala stuì suttacumber a lur adversarias da Zug. Ditg hai vis or bain per las HCD Ladies, ellas manavan schizunt cun 3:0, suenter han las dunnas da Zug dà gas ed egalisà la partida. En la prolungaziun ha l'EVZ la finala fatg il gol decisiv. Uschia han las dunnas da Tavau suenter quatter gieus 10 puncts sin lur conto, quai munta plazza dus. A la testa è l'EV Zug.
29-09-2024
Las HCD Ladies han gudagnà trais ulteriurs puncts. Las Grischunas han battì la dumengia las damas dad Ambri Piotta cun 2:1. En la tabella èn las HCD Ladies uschia sin plazza dus – cun nov puncts suenter quatter partidas. A la testa da la tabella èn las dunnas da l'EV Zug.
28-09-2024
HCD Ladies perdan cunter EV Zug
Las HCD Ladies han pers lur gieu a chasa cunter las giugadras dal EV Zug – quai cun 4:5. Cumenzà han las dunnas da Tavau ferm: Suenter l'emprim terz eran ellas en avantatg cun 3:2, dentant han las giuadras da Zug il segund terz anc sajettà dus gols ed han uschia pudì volver il gieu.
22-09-2024
Ulteriurs trais puncts per las HCD Ladies
Il viadi a Turitg ha rendì per las dunnas dal HCD Ladies. Ellas han battì las giugadras dals ZSC Lions cun 4:2 ed uschia gudagnà ulteriurs trais puncts. La finamira che las HCD Ladies han per questa stagiun è la qualificaziun per ils playoffs. Sche las damas da Tavau giogan vinavant sco cumenzà, para questa finamira palpabla.
07-09-2024
Start da las HCD Ladies è gartegià
L'emprim gieu en la Women's League han las Ladies da Tavau giugà a Biasca cunter las HC Ambri Piotta Girls. Il gieu è ditg stà gulivà, trais giadas è Ambri Piotta ì en avantatg – e las HCD Ladies han pudì egualisar. 1:1 èsi stà suenter l'emprim terz e 3:3 suenter il segund terz.
Ma en l'ultim terz han las dunnas da Tavau pudì avanzar ed han sajettà in gol suenter l'auter fin ch'il gieu ha finì cun il resultat final da 6:3 per Tavau. L'emprim gieu da la stagiun cun ina clera victoria, in cler success che lascha spetgar dapli.
06-09-2024
Prevista
Las HCD Ladies partan en la segunda stagiun da la Women’s League. Suenter in onn nua ch’ellas han manchentà ils playoffs be per paucs puncts, duessi ussa gartegiar. L’equipa da dunnas dal HCD è ina d'otg equipas che cumbattan per il titel da champiunessas svizras.
Dacurt ha il Club da hockey da Tavau festivà ses giubileum da 100 onns. Il HCD po mirar enavos sin ina gronda istorgia. L’equipa grischuna è cun 31 titels campiun svizzer da record. Ed il HCD tegna ensemen cun il Team Canada il record da victorias da la Cuppa Spengler. Sco equipa cun uschia ina gronda tradiziun eri da spetgar ch'il HCD va era cun ina equipa da dunnas en il campiunadi.
HC Thurgau Ladies han fatg midada a Tavau
La stagiun passada lura ha il HCD pudì surpigliar quasi l’entira equipa da las HC Thurgau Ladies ed ha uschia fundà l’equipa da dunnas HCD Ladies. Cun quella equipa participescha la squadra da tradiziun al campiunadi svizzer en la Women’s League. Sco tar ils umens èn era tar las dunnas Berna, Turitg e Zug las grondas e potentas equipas. Las HCD Ladies tutgan er en quest circul, quai dentant pervia la gronda tradiziun da l’equipa dals umens dal Club da hockey da Tavau. La splendur da l’equipa dals umens traglischa fin tar las dunnas era sche quellas statan pir al principi da lur viadi. La finamira è dentant ch'era las HCD Ladies vegnan insacura ad avair il medem success sco lur pendent masculin.
La qualificaziun per ils playoffs è la finamira
Durant l’emprima stagiun en la Women’s League, la pli auta liga da hockey da dunnas en Svizra, han las HCD Ladies manchentà la qualificaziun per ils playoffs per in pèr paucs puncts. Questa stagiun duai quai dentant gartegiar cun la qualificaziun per la fasa decisiva dal campiunadi. Perquai han las HCD Ladies anc ina giada rinforzà l’equipa ed engaschà ina nova trenadra. Da nov timunescha Johanna Ikonen da la Finlanda la giuvna equipa da Tavau.
