Er en il quart gieu da la Ranking Round pon las HCD Ladies persvader. Ordaifer na laschan las Grischunas nagina schanza a las damas da Langenthal. Era sche l'emprim terz è anc stà senza gols èsi sura gartegià da sajettar in gol en il segund terz. Elura, en pauc dapli che las ultimas 10 minutas han las Ladies lura pudì festivar in gol suenter l'auter e finì la partida cun ina victoria clera da 4:0.
Tavau gudogna cunter Friburg
Er il terz gieu da la Ranking Round va a favur da la squadra da Tavau. Las HC Tavau Ladies gudognan cun 4:2 cunter Friburg. Tavau ha tranter auter pudì profitar da dapli powerplay.
Il proxim gieu giogan las dunnas en dumengia cunter Langenthal. En la Ranking Round datti en tut sis gieus.
Tavau gudogna cunter Lugano
Gist cun 0:4 gudognan las dunnas da Tavau il gieu ordaifer cunter Lugano. Suenter in emprim terz relativ quiet, ha Tavau attatgà en il segund e terz terz. Cunter Lugano paran las hockeyanras da Tavau insumma da savair tge far. Dals davos 5 gieus cunter Lugano han ellas gudagnà quatter.
Victoria cunter Langenthal
La Ranking Round ha cumenzà bain: Tavau ha gudagnà cun 3:2 a chasa cunter il SC Langenthal. L'emprim gol hai dà en il segund terz, nua che Katherine Sonntag ha gist fatg dus gols entaifer duas minutas.
Tavau n'è betg en ils playoffs
Er sche l'equipa ha gudagnà 2:0 cunter Langenthal, n'hai betg tanschì per ils playoffs en la Women's League. A chasa han els dà avant 163 aspectaturas ed aspectaturs, ils gols han Sonntag e Mason sajettà.
Tavau è pia en la Ranking Round, nua ch'ella sto dar cunter Fribourg-Gottéron, Lugano e Langenthal. En ils playoffs èn il SC Berna, las ZSC Liunessas, ils HCAP Girls e Neuchâtel Hockey Academy. La decisiun per Tavau è vegnida pir en ils davos gieus. Neuchâtel, quatter puncts avant Tavau en la tabella, ha gudagnà ils davos quatter gieus, Tavau ha perdì sis dals davos otg gieus.
Per lunsch la meglra avanzadra en questa fasa avant ils playoffs è stada Estelle Duvin (34 gols en 27 gieus). Er Maija Otamo da Berna ha dà ferm (21 gols). Berna ha er gì enfin uss la stagiun cun il pli bler success. Da Tavau è Leah Marino l'avanzadra cun ils pli blers gols, 15 giadas ha ella tutgà en 27 gieus. Janine Hauser da Tavau ha dà ils pli blers assists (19 en 27 gieus e tschintg gols).
Sconfitta cunter Turitg
Danovamain han en la Women's League las HCD Ladies pers la partida ordaifer cunter las ZSC Lions, Questa giada 4:1. Cun entant dus gols incassads han las dunnas da Tavau fatg en il segund terz lur emprim e sulet gol. Silsuenter han ellas anc ina giada stuì endirar dus ulteriurs gols – quai senza anc ina giada avair la pussaivladad da sez far in.
HCD Ladies perdan cunter ZSC Lions cun 4:5
En la Women's League da hockey sin glatsch han las HCD Ladies pers la partida ordaifer cunter las ZSC Lions cun 4:5. Fin las ultimas minutas èsi anc stà in pari, dentant han las Turitgaisas en l'ultima minuta anc sajettà il gol decisiv.
HCD Ladies perdan cunter Ladies Lugano
En la Women's League da hockey sin glatsch han las HCD Ladies pers la partida a chasa cunter il Hockey Club Ladies Lugano – quai cun 0:1. Il sulet gol da la partida ha fatg Matilde Fantin en il segund terz.
HCD Ladies perdan 1:2 cunter HC Friburg-Gottéron
En la partida a chasa han sonda suentermezdi las Gischunas pers 1:2 cunter las adversarias dal HC Friburg-Gottéron. Il cumenzament dal segund terz han las HCD Ladies pudì far in gol ed egualisar al 1:1 – mo ina minuta e mesa pli tard ha Fribourg-Gottéron danovamain tutgà il gol. Las HCD Ladies restan sin plazza 4 da la tabella.
HCD Ladies perdan 0:2 cunter Ambri
Per las HCD Ladies hai dà ina terrada ordaifer cunter las dunnas dad Ambri. Ellas perdan cun 0:2. Ils gols ha Ambri sajettà en la 13avla ed en la 26avla minuta. Passa ina minuta avant la fin da la partida ha Tavau prendì or dal gieu sia golia, Jessica Streicher – senza pudair midar insatge vi dal resultat. Las HCD Ladies restan sin rang 4 da la tabella.
HCD Ladies gudognan 4:1 encunter Langenthal
Las HCD Ladies han gudagnà il gieu a Schwarzenbach en il chantun Berna cun 4:1. Cumenzà ha il gieu dentant cun avantatg per las Bernaisas da Langenthal. Ellas han fatg l'emprim gol en la 18avla minuta. Las Grischunas han suenter tschintg minutas en il segund terz pudì egualisar. Katherine Sonntag ha en la 55avla minuta vulvì il gieu e fatg il 2:1 per Tavau.
En la 59avla minuta ha Langenthal prendì or dal gieu ses goli. Las giugadras da Tavau han alura nizzegia la schanza da tutgar il gol vid. E per finir hai anc dà 16 secundas avant la fin il quart gol – per il resultat final da 4:1.
HCD Ladies perdan cunter las Bernaisas
Las HCD Ladies han pers il mardi saira cun 0:2 ordaifer cunter Berna – ina da las fermas equipas dal campiunadi. La partida ha gì lieu a Gstaad en la Part Sura Bernaisa, 120 persunas han persequità il duel tranter las emprimas e las quartas dal classament. E las dunnas da Tavau han ditg pudì tegnair pitg. Pir en la 53avla minuta han las Bernaisas sajettà l'emprim gol. Ed il gol decisiv è crudà en las davosas secundas da la partida – cura che las HCD Ladies giugavan senza golia.
Pers avant ina grondiusa culissa
En il rom da la Cuppa Spengler han las dunnas da Tavau pudì dar la partida da campiunadi cunter las Ambri-Piotta Girls. E la culissa è stada impressiunanta, cun 1’605 aspectaturas ed aspectaturs.
La partida ha cumenzà bain per las HCD Ladies. Enfin la 58avla minuta han ellas pudì tegnair il 2:1. Theresa Knutson dals Ambri-Piotta Girls ha lura dentant egualisà. E cun il gol decisiv al 2:3 en la prolungaziun, han las Ladies stuì laschar ils puncts a las Tessinaisas.