La curuna da la festa da lutga grischuna glarunaisa è puspè enavos en il Grischun. En la lutga finala a Flem n'ha Armon Orlik laschà a Roger Rychen nagina schanza. Suenter 45 secundas ha Orlik dumagnà Rychen en il resgim ed ha smatgà quel sin il dies. La victoria a Flem è la tschintgavla per Armon Orlik tar la festa grischuna glarunaisa. El ha gia gudagnà la festa ils onns 2016-2019.
Victoria per il cunfavurit
Davent da l’entschatta ha Armon Orlik tutgà tar ils cunfavurits da la festa grischuna glarunaisa a Flem. Il lutgader da Maiavilla ha gudagnà la lutga grischuna glarunaisa dal 2016 fin il 2019 quatter giadas en seria. Las davosas duas lutgas chantunalas han alura gudagnà lutgaders d'ordaifer il chantun Grischun. Uschia ch'igl è uras ch'il titel turna puspè en il chantun Grischun.
Ils emprims èn datiers in da l'auter
Sper Orlik, ch'ha gì fin a la davosa runda quatter victorias e mo in pari en la lutga d’avertura encunter Kilian Wenger, han era persvadì Domenic Schneider dal chantun Turgovia, Roger Rychen da Glaruna, Andreas Niederer, Andy Signer e Silvio Oettli. Curdin Orlik è era da la partida tranter ils megliers set. Er el perda mo in punct sin ses frar Armon Orlik.
Societad da lutga da Flem
Gia dapi 75 onns datti la Societad da lutga da Flem. Il club ch'è dachasa al pe dal Crap Son Gion vul festivar quest giubileum cun ina gronda festa. Uschia ha Flem candidà sco lieu d’occurrenza da la festa da lutga grischuna glarunaisa e survegnì l’incumbensa. Suenter il 2016 ha uschia puspè ina giada lieu la festa da lutga grischuna glarunaisa a Flem. La festa chantunala è per la Societad da lutga ina stupenta occasiun da mussar il sport er a giuvnas e giuvens ch’èn anc forsa betg uschè famigliars cun il sport. Sper ils activs ha er la giuventetgna la pussaivladad dad ir en il resgim.
Circa 180 lutgaders cumbattan per la curuna da lutga
Gia baud han ils organisaturs da la festa da lutga grischuna glarunaisa a Flem cumenzà cun l’organisaziun da la festa. Uschia è uss tut pront a Flem per in grond spectacul en il resgim. Er gia baud han ins cumenzà ad envidar lutgaders dad autras associaziuns. Uschia van ils frars Armon e Curdin Orlik a la partenza da la lutga chantunala a Flem, dentant era il segund da la lutga federala a Pratteln Domenic Schneider dal chantun Turgovia ed il retg da lutga Kilian Wenger. Quest quartet vegn segir ad esser la gronda attracziun da la festa grischuna glarunaisa.
Lutgaders grischuns cun buna speranza, dentant er cun inqual blessà
Per ils lutgaders grischuns è la festa grischuna glarunaisa LA festa da chasa. Quella festa vulan els gudagnar. Fin tar la pandemia da corona è quai gartegià ad Armon Orlik quatter giadas. Suenter la pandemia eran Samir Leuppi da Winterthur e Samuel Giger dad Ottoberg ils victurs. Uras pia che la curuna da la festa grischuna glarunaisa turna puspè en il Grischun.
