Mats e giuvenils en la vegliadetgna da nov fin a 16 onns han participà a la lutga da primavaira a Vaz Sut. La lutga da primavaira, organisada da la societad da lutga dad ‘Unterlandquart’ è stada l’emprima lutga da questa stagiun sut tschiel avert. Stgars 400 giuvenils eran da la partida tar la lutga da primavaira. Tranter quels era in maun plain giuvens lutgaders da l’Engiadina.
Las experientschas ch'ins fa tar ina festa da lutga valan dapli che tschintg trenaments.
Trenar l’enviern per far bunas lutgas la stad
Gia dapi il november treneschan ils giuvens lutgaders per las festas da lutga. Il trenament è gist uschè impurtant sco tar ils activs. Era il program dals giuvens lutgaders è fitg bain emplenì. Durant ils mais da la stad spetgan circa 20 lutgas sin ils giuvens lutgaders. Per ils lutgaders engiadinais è segir la lutga da mats la fin da zercladur in dals puncts culminants da quest onn da lutga. Per l’emprima giada ha questa lutga, organisada da la societad da lutga engiadinaisa, lieu a Tarasp en Engiadina Bassa.