La ‘Chà cora’ è ina veglia chasa engiadinaisa. La chasa imposanta cunfina directamain cun la loipa dal Tour de ski a Tschierv. Las atletas ed ils atlets dal Tour de ski passan quasi tras la stiva dal proprietari da la chasa Chasper Stuppan. L’anteriur scolast giauda las cursas ensemen cun in mantun glieud sin la terrassa da sia chasa.
In divertiment, era sch'ils chanuns da naiv tschivlan
Gia l’october cumenzan ils organisatur da las etappas dal Tour de ski a Tschierv cun l’installaziun da l’infrastructura per las cursas a Tschierv. Lura dat quai in zichel disturbi enturn chasa, di il proprietari da chasa Chasper Stuppan. Surtut la canera dals chanuns da naiv che giran durant las notgs fan in zichel fadia. Quai na disturba dentant betg enorm. Insumma è quai bel sch'i marscha mintga dus onns insatge a Tschierv, di Chasper Stuppan vinavant. Ed uss ch'ils organisaturs han perfin installà tualettas mobilas n'è l’igiena avant e suenter las cursas era nagin problem. Avant onns aveva l’ami e grond concurrent da Dario Cologna, Petter Northug da la Norvegia, fatg ses basegn sper la chasa.
