Johannes Kläbo ha gudagnà per la terza giada en sia carriera il Tour de ski. Las davosas sis etappas ha el gudagnà tuttas, la dumengia ha il Norvegiais stuì magunar l’emprima schleppa ed è vegnì sisavel.
Gudagnà en la disciplina da stil liber sur 10 kilometers ha Simen Krüger, ch’è uschia anc sa meglierà sin il segund plaz dal classament general. Meglier Svizzer è stà Candide Pralong sco 29avel.
La sonda ha Cyril Fähndrich tegnì ditg petg cun il champ dals pli svelts, ed è sa tschentà la fin sin il 28avel plaz. Beda Klee e Roman Furger èn sin ils plaz 40 e 41, e Candide Prolog sin il 47avel plaz.
Fähndrich ha stuì ceder in pau suenter ils emprims success
Frida Karlsson ha duvrà tuttas forzas per cuntanscher la victoria en il classament general. Suenter ses 15avel plaz en il stil liber sur 10 kilometers ha ella duvrà tgira medicinala.
Nadine Fähndrich n'ha betg pudì pli en las davosas etappas. Suenter ses 28avel plaz il venderdi ha ella ditg, ch'ella saja «simplamain stancla». Dumengia ha ella fatg 31avla ed è plazzada en il classament general sco 22avla.
Fähndrich ha gì avant il venderdi ina seria da victorias. Lura è la lucernaisa dentant crudada ora en il mezfinal il venderdi.
Quarta etappa la gievgia
Nadine Fähndrich ha ditg pudì tegnair cun cun la gruppa da persecuziun, ha lura dentant stuì laschar avrir ina largia curt avant la fin. Ella vegn 16avla.
Anja Weber mussa ina cursa ferma e sa classescha sin plaz 22. La terza svizra Nadja Kälin perda passa 7 minutas sin las meglras e sto sa cuntentar cun plazza 49.
Ils Svizzers Candide Pralong Beda Klee e Cyril Fähndrich va n en ils top 30 cun ils plazs 22, 23 e 28.
Terza etappa
Al Tour de ski ad Oberstdorf en Germania è la Svizra Nadine Fähndrich vegnida 16avla en la cursa sur 10 kilometers stil classic, cun partenza individuala.
Ils umens svizzers cuntinueschan il tour en l'Allgäu anc cun quatter chaus. Tar plievgia han els gì bun material. Il meglier resultat ha fatg Cyril Fähndrich. Il frar da Nadine Fähndrich ha pers 12,46 secundas. Er Beda Klee e Candide pralong han dumagnà en ils top 20.
Segunda etappa
En la segunda etappa da persecuziun da las dunnas è la favurita svizra Nadine Fähndrich sin plazza 9. La Lucernaisa da 27 onns ha in retard da passa ina minuta sin la nova leadra Tiril Weng da la Norvergia.
Impressiuns da Tschierv
-
Bild 1 von 3Legenda: Mar da brentina sin il pass dal Fuorn RTR, Roman Dobler -
Bild 2 von 3Legenda: L’areal dal Tour de ski anc en la brentina RTR, Roman Dobler
-
Bild 3 von 3Legenda: Il sulegl vegn a splendurar er oz RTR, Roman Dobler
Il norvegias Johannes Kläbo ch'ha gia gudagnà il sprint da l'emprima etappa, gudogna. Il meglier svizzer è stà Johannes Baumann ch'è sin plazza 37. Quatter plaz suenter è Candide Pralong.
Emprima etappa en la Val Müstair
Nadine Fähndrich ha gudagnà da moda e maniera suverana l’emprima etappa, il sprint dal Tour de ski en Val Müstair. Ella ha gudagnà la qualificaziun e suenter er tut las cursas da k.o. Tar il Tour de ski en Val Müstair festivescha ella sia terza victoria en seria. Fin uss n'era nagina autra passlungista uschè ferma en il sprint sco Nadine Fähndrich. Medem sco Nadine Fähndrich ha er fatg il grond favurit da la Norvegia, Johannes Kläbo.
Ils sulets Svizzers en ils top 20 èn stà Janik Riebli sco settavel e Valerio Grond sco novavel.