Il pli svelt è Sofia Goggia vegnida aval. 1:16,63 minutas ha ella duvrà per il super-G a San Murezzan. Er Gut-Behrami è vegnida giu la Corviglia cun 1,02 secundas retard, ed ha segirà il terz plaz sin il podest en la cuppa mundiala.
Sin il segund plaz è Cornelia Hütter da l'Austria vegnida (0,95 secundas retard sin Goggia), cnap avant Gut-Behrami. Suenter Gut-Behrami èn Shiffrin e Brignone vegnidas quartas e tschintgavlas. Sin l'otgavel plaz è Corinne Suter cun 2,07 secundas retard sin Goggia.
Tschellas Svizras èn sin plazzas 13 (Joana Hählen), 17 (Jasmine Flury), 20 (Michelle Gisin), 21 (Delia Durrer), 24 (Priska Nufer) e 30 (Jasmina Suter, 4,26 secundas retard). Juliana Suter crudada ora.
Las meglras skiunzas dal mund s’inscuntran questa fin d’emna sin la Corviglia sur San Murezzan. Igl èn stadas las emprimas cursas sin las lattas lungas per las dunnas questa stagiun. Sonda spetga ina cursa rapida e la dumengia spetgan in ulteriur super-g sin las skiunzas. Sin l'enconuschenta pista da la Corviglia vulan las Svizras mussar als agens fans bunas prestaziuns.
Nov skiunzas svizras èn a la partenza
La squadra svizra che va a la partenza da las cursas da chasa è fitg gronda. Ils pli gronds trumfs svizzers èn dentant Lara Gut-Behrami, Corinne Suter e la grischuna Jasmine Flury. Ellas han tuttas gia mussà tar las cursas a San Murezzan bunas prestaziuns e cler ch’ellas vulan far questa fin d’emna puspè il medem. Sin il conto ha ins era dad avair a Federica Brignone. La taliana è segir quella che vegn ad avair in pled en chapitel, quai che pertutga la victoria.
