La stagiun da skis da la cuppa mundiala ha puspè cumenzà cun il slalom gigant da las dunnas a Sölden en Austria. Lara Gut-Behrami è stada la pli sperta. Suenter l'emprim percurs ella la Svizra anc quarta. Cun in segund percurs excellent ha ella battì la Taliana Federica Brignone, la pli sperta da l'emprim percurs, per dus tschientavels. Cun quai gudogna Lara Gut-Behrami gia per la terza giada a Sölden sind il glatscher. Terza è vegnida Petra Vlhova.
- Lara Gut-Behrami (SUI) 2:18,94
- Federica Brignone (ITA) +0,02 secundas
- Petra Vlhova (SVK) +0,14 secundas
Ses Svizras en ils puncts
Mélanie Meillard ha mussà in segund percurs da gronda qualitad ed ha fatg il sigl dal 30avel sin il 19avel plaz. Cun quai è ella stada la segund meglra Svizra. Gist davos ella èn Michelle Gisin sco 19avla e Simone Wild sco 20avla sa plazzadas. Wendy Holdener e Camille Rast cumpletteschan ina prestaziun da team solida.
Las autras Svizras:
- 17. Mélanie Meillard + 3.00
- 19. Michelle Gisin +3,04
- 20. Simone Wild +3,16
- 22. Wendy Holdener +3,23
- 29. Camille Rast +3,57
- Betg en il segund percurs: Andrea Ellenberger e Corine Suter
Disqualificaziun pervi da tschaira
Ragnhild Mowinckel, che fiss stada 6avla suenter l'emprim percurs, è vegnida disqualifitgada pertge che la tschaira da ses skis aveva memia bler fluor. La FIS ha midà las reglas davart la cumposiziun legala da la tschaira, la tschaira da fluor ch'è nauscha per l'ambient è vegnida scumandada.
