- Andres Ambühl ha annunzià da terminar sia carriera da profi cun la fin da questa stagiun, scriva ses club il HCD en ina communicaziun.
- L'attatgader da 41 onns ha fatg passa 1300 partidas en la National League, quai per il HCD ed ils ZSC Lions.
- Per la squadra naziunala ha el fatg part a 19 campiunadis mundials e tschintg gieus olimpics.
Nus avain gì blers cools temps ensemen. Lain anc ina giada dar tut per che nus pudain anc avair in da quests bels muments ensemen.
Andres Ambühl è gia uss ina vaira legenda dal HCD e dapi onns ina sche buc LA fatscha dal club. Dasper in onn en ils Stadis Unids e trais onns tar ils ZSC Lions, ha l'attatgader da 41 onns adina purtà il tricot blau mellen da Tavau. Ses emprim gieu per il HCD ha Ambühl giugà avant ualti exact 24 onns, sco giuven da 17 onns. Enfin oz ha el dà 1305 gieus en la pli auta liga svizra, uschè blers gieus n'ha nagin auter sin il conto. La gronda part da quest gieus ha el dà per ses club da chasa, il HCD. Insumma è Ambühl ch’è creschì si sin in bain puril a Tavau-Sertig in giugader da records. Per la Svizra ha el absolvì 338 gieus, ed è stà a 19 campiunadis mundials – cifras per la perpetnadad.
Um da records er en la squadra naziunala
Er sin nivel internaziunal ha Ambühl laschà enavos fastitgs durant dus decennis. Il 2004 ha el giugà l'emprima giada in campiunadi mundial, suandads èn ulteriurs 18 campiunadis mundials cun sia participaziun. Il 2013 e 2024 ha el ensemen cun la squadra svizra gudagnà la medaglia d'argient. Dals 338 gieus per la naziunala, ha el dà 141 partidas a campiunadis mundials, uschè bleras partidas n'ha nagin auter dà. Il 2022 ha el surpassà il record d'enfin lura dal Tudestg Udo Kiessling. Pussaivel è ch'anc dapli partidas vegnan sin il conto d'Andres Ambühl als proxims campiunadis mundials ch'èn la primavaira en il Danemarc e la Svezia.
